Ótpeli dáýirdiń qıyndyqtaryn kótere bildik - Samurat Imandosov
Táýelsizdik jyldarynyń qalyptasý jyldary jaıynda «Rza» AQ prezıdenti Samurat Imandosov sol bir qıyndyq týyndaǵan shaqty osylaısha eske aldy, dep habarlaıdy QazAqparat tilshisi.
«Qalyptasqan ekonomıkalyq baılanystar úzildi. Halyqtyń turmysy kúrt tómendedi. Inflıatsııa sharyqtady. 1992 jyldyń basynan Reseı baǵany yryqtandyryp, naryqtyq ekonomıkanyń alǵysharttary ómirge engizile bastady. Osy jyldyń aqpan aıynda men HІІ shaqyrylǵan Qazaq KSR Joǵarǵy Keńesiniń ketip qalǵan depýtaty, Qazaqstan Kompartııasy Ortalyq Komıtetiniń ekinshi hatshysy bolyp qyzmet istegen Vladıslav Anýfrıevtiń ornyna halyq qalaýlysy bolyp saılandym. Osyǵan deıin, 1991 jyldyń 16 jeltoqsanynda Qazaqstan óziniń memlekettik Táýelsizdigi týraly Konstıtýtsııalyq zańdy qabyldaǵan bolatyn.
1992 jyl el úshin, bizdiń eldigimiz úshin synaq jyly boldy. Qazaqtyń ózgelermen terezesi teń, keregesi keń memleket qurýǵa qabilettiligi synǵa tústi. Birligimizdiń ózi synǵa tústi. Kóp uzamaı-aq Táýelsizdigimizdiń sımvoly retinde memlekettik Tý, Ánuran qabyldandy. 1992 jyldyń 2 naýryzynda BUU Bas assambleıasy Qazaqstandy Birikken ulttar uıymyna múshelikke qabyldady. Qazaqstan BUU-nyń 168-shi múshesi bolyp endi.
Barlyǵynan da elimizde ekonomıkalyq reformalardy júrgizý, ony derbes táýelsiz memleket retinde zańdy qujattarmen qamtamasyz etý asaa kúrdeli bolǵan edi. Biraq, Prezıdent Nazarbaev osynaý saıası jáne ekonomıkalyq reformalarǵa batyl kiristi. Ulttyq memleketimizdiń ómir súre alatynyna kúmán keltirgender de boldy. Eń aldymen Memleket basshysy qojyraǵan tutyný rynogyn qalpyna keltirý, ony eńbekke yntalandyrý arqyly júzege asyrý kerektigin aıqyn túsindi. Prezıdent sheteldik ınvestıtsııalardy tartýǵa barynsha kóńil bóldi. Onsyz sharyqtaǵan ınflıatsııa men bıýdjet tapshylyǵyn joıýǵa bolmaıtyn edi. Ózimiz kýá bolǵandaı, sol jyldary ınflıatsııa aı saıyn 70-100 paıyzǵa deıin ósip otyrdy.
1992 jyly aqpan aıynda Elbasy Jarlyǵymen ákimdik ınstıtýty engizildi. Ákimdik qyzmet laýazymy engizilgennen kúnnen bastap búkil qazaqstandyq sıpatqa ıe bolǵan «ákim» sózi 70 jyl boıy saıası jáne atqarýshy bılik sımvolyna aınalǵan úırenshikti uǵymdarǵa basqasha túsinik qalyptastyra bastady. 1994 jyly Qazaly aýdanynyń ákimi bolyp taǵaıyndaldym. 1992 jyldyń aqpanynda HІІ shaqyrylǵan Qazaq KSR Joǵarǵy Keńesiniń depýtaty bolyp saılanǵanymda №86 jyljymaly mehkolonnanyń bastyǵy edim. Kásiporynda 1000-ǵa tarta adam jumys istedi. Sol jerde júrip ysyldym, tájirıbe jınaqtadym. Jumysshylarmen aralasý, olardyń jan-dúnıesin túsiný úlken ómir fılosofııasy eken. Jaqsy basshy bolý úshin jumysshylarǵa da óz otbasyńdaı qaraý kerek. Sonda ǵana jurt seni qurmetteıdi. Abyroısyz bolǵanym joq. Depýtat retinde Qazaqstannyń alǵashqy zań aktilerin qabyldaýǵa qatystym. Keıin kásipkerlikke biryńǵaı bet burdym. Jalpy men bılikke, kásipkerlikke kóldeneń jaǵdaıdan kelgenim joq. Ómirden birshama tájirıbe jınaqtadym. Qoldan kelgenshe adamdarǵa, ásirese jumysshy halyqqa kómek kórsettim. Al bul Táýelsizdiktiń alǵashqy jyldarynda aýyr synaqqa tap bolǵan halyq úshin aýadaı qajet edi.
Jalpy, men basqaratyn «RZA» aktsıonerlik qoǵamynyń tirshiligi san salaly. Ol mal óndirýden bastap, kóptegen aýyl sharýashylyǵynyń basqa da ónimderin shyǵarýmen, qurylys júrgizýmen, ınfraqurylym nysandaryn salýmen aınalysady. Osynyń barlyǵy el úshin jumys kózi, bıýdjettiń tabysy bolyp tabylady. Mine, shırek ǵasyr ishinde biz osyndaı jetistikterge qol jetkizip otyrmyz. Bul halyqtyń erteńgi kúnge seniminiń, qıyndyqqa qarsy tura biletin qaısarlyǵynyń, Elbasynyń sarabdal saıasatynyń aıqyn jemisi dep túsinemin»,-deıdi S. Imandosov.
