Ótken jylǵy ІT-qyzmetterdiń eksporty 1 mlrd dollarǵa jetti
ASTANA. KAZINFORM – 2025 jyly elimizdiń ІT-naryǵynyń kirisi 2 trln teńgege jetýi múmkin. Bul týraly búgin Úkimet otyrysynda Premer-mınıstrdiń orynbasary – Jasandy ıntellekt jáne tsıfrlyq damý mınıstri Jaslan Mádıev aıtty.
- Sońǵy jyldary IT-naryq kiristeriniń kúrt ósýi baıqaldy. Ótken jyly ol 2 trln teńgeni qurady dep boljanýda. IT-qyzmetteriniń eksporty da qarqyndy damyp keledi. 2025 jyly 1 mlrd dollarǵa jetedi dep kútemiz. Memleket basshysy bul kórsetkishke 2026 jyly qol jetkizý mindetin qoıdy. IT-salasy elimizdegi eń joǵary jalaqy tólenetin salalardyń biri. Resmı statıstıkaǵa sáıkes, IT-mamandarynyń jalaqysy eldegi ortasha jalaqy deńgeıinen eki esege joǵary, - dedi ol.
Vıtse-premerdiń aıtýynsha, Astana Hub ІT-salasynyń negizgi ekojúıesi sanalady. Astana Hub qatysýshylarynyń sany ótken jyly 2 000-ǵa deıin ósti. Olardyń ishinde 25 paıyzǵa jýyǵy sheteldik kompanııalar.
- Bul elimizdiń halyqaralyq básekege qabilettiliginiń kórsetkishi. Astana Hub startaptary men IT kompanııalary qazirdiń ózinde 30 myńnan astam jumys ornyn ashty. Al ekonomıkaǵa salynǵan ınvestıtsııa somasy 900 mln dollardan asty. Astana Hub ınfraqurylymy men ozyq tájirıbesi damyǵan elderde aýqymyn keńeıtip keledi, - dedi Jaslan Mádıev.
Buǵan deıin Premer-mınıstr Oljas Bektenov «Digital Qazaqstan» strategııasyn ázirleýdi jedeldetýdi tapsyrǵanyn jazǵan edik.