Ótken aptada 10 taýar túriniń baǵasy tómendedi

ASTANA. KAZINFORM - 22 maýsym kúni Úkimette Premer-Mınıstrdiń orynbasary Serik Jumanǵarınniń tóraǵalyǵymen ótken jıynda áleýmettik mańyzy bar azyq-túlik taýarlary baǵasynyń sońǵy aptaǵy jaǵdaıy talqylandy, dep habarlaıdy Saýda komıtetiniń baspasóz qyzmeti. 

Saýda jáne ıntegratsııa mınıstrliginiń usynǵan derekterine sáıkes, ekinshi apta qatarynan áleýmettik mańyzy bar azyq-túlik taýarlarynyń ortasha respýblıkalyq ındeksi turaqty jáne 100% quraıdy. Jyl basynan beri ÁMAT baǵa ındeksi de turaqtylyqty, 99,9% quraıdy.

Ótken aptada 10 taýar túriniń baǵasy tómendedi. Olardyń ishinde: sábiz 1,8% - ǵa, qaraqumyq jarmasy 0,7% - ǵa, nan men qant 0,3% - ǵa, jumyrtqa 0,2% - ǵa, sondaı-aq un, kúrish, kúnbaǵys maıy, sút jáne súzbe 0,1% - ǵa arzandady. Rojkı, sary maı, sıyr eti, taýyq eti jáne aıran sııaqty basqa ónimderdiń baǵasy turaqty.

Aımaqtardaǵy azyq-túlik baǵasynyń jaǵdaıy da turaqty bolyp qala beredi. Elimizdiń tórt oblysynda - Astana qalasy, Qaraǵandy, Qostanaı jáne Jambyl oblystarynda — baǵa turaqtylyǵy baıqalady. Baǵanyń tómendeýi bes oblysta tirkeldi: Ulytaý (-0,6%), Túrkistan oblysy (-0,4%), Mańǵystaý jáne Batys Qazaqstan oblystary (-0,2%), Almaty oblysy (-0,1%).