Otbasynan – ulttyń tamyryna: Kókshetaýda Halyqaralyq otbasy kúni keń kólemde atalyp ótti
KÓKShETAÝ. KAZINFORM – 15 mamyr – Halyqaralyq otbasy kúnine oraı Kókshetaýda erekshe máni bar «Otbasy aǵashy» atty oblystyq aktsııa ótti.
Bul shara — otbasy qundylyqtaryna beıjaı qaramaıtyn jandardy biriktirip, «Mereıli otbasy–2025» ulttyq baıqaýynyń jańa kezeńine sımvoldyq bastaý berdi. Aktsııaǵa burynǵy jeńimpaz jáne qatysýshy otbasylar, qoǵamdyq uıymdardyń ókilderi, ata-analar men balalar qatysty. Olar birlese otyryp «otbasy aǵashyn» otyrǵyzyp, túrli baıqaýlarǵa qatysyp, shabyt syılaıtyn ómirlik oqıǵalarymen bólisti.
Sharanyń ashylý saltanatynda Aqmola oblystyq ishki saıasat basqarmasy basshysynyń orynbasary Sabyrhan Kenjebaev sóz sóılep,merekemen quttyqtady.
«Otbasy – ár adamnyń tiregi, mahabbat pen rýhanı qýattyń bastaýy. Búgin osynda jınalǵan barlyq otbasyǵa alǵys aıtamyn. Biz tek bir sımvoldyq aǵash otyrǵyzyp qoımaı, úlken bir izgi bastamanyń jalǵasyn bastadyq. ‘Mereıli otbasy’ — bul qazaq otbasynyń eń jaqsy qyrlaryn tanytatyn mańyzdy alań. Osyndaı baıqaýlar – qoǵamǵa durys baǵyt silteıtin baǵdarsham», – dedi ol.
Sabyrhan Kenjebaevtyń aıtýynsha, Aqmola oblysynda jyl saıyn ondaǵan otbasy baıqaýǵa qatysady. Aýdandyq jáne qalalyq kezeń jeńimpazdary respýblıkalyq deńgeıde óńir namysyn qorǵaýǵa múmkindik alady. Jergilikti deńgeıde ótinim qabyldaý 15 mamyrdan 15 maýsymǵa deıin, al oblystyq komıssııa 15 shildege deıin qujattardy qarastyrady.
Ótken jylǵy baıqaýdyń eń jarqyn qatysýshylarynyń biri — kókshetaýlyq Kóńbaı otbasy. Bul áýlet birneshe urpaqtyń yntymaǵy men eńbegi arqyly naǵyz otbasy dástúriniń úlgisin kórsetip otyr.
«Biz – úlken áýletpiz. Áke-sheshem on bala ósirip tárbıeledi, qazir 35 nemere, 46 shóbere bar. Ótken jyly ‘Mereıli otbasy’ baıqaýynda oblystyq kezeńniń Gran-prı ıegeri boldyq. Bul — úlken mártebe. Osy baıqaýǵa qatysatyn jańa úmitkerlerge sáttilik tileımin. Sebebi myqty memleket – myqty otbasydan bastalady», – dedi teatr jáne kıno akteri, QR eńbek sińirgen mádenıet qaıratkeri Tóleýbek Kóńbaı.
Sharada óńirdegi qoǵamdyq uıymdardyń ókilderi de otbasy qundylyqtarynyń mańyzdylyǵyna erekshe toqtaldy. Aqmola oblystyq Ákeler odaǵynyń tóraǵasy Nurshárip Sandyqbek:
«Otbasy – bul kishkentaı memleket. Biz el bolamyz desek, otbasynda eńbekke, ata-anaǵa qurmetke, súıispenshilikke baýlýdy úıretýimiz kerek. Ákeler odaǵy 2018 jyldan beri jumys isteıdi. Osyndaı sharalar – bolashaq azamattardyń qalyptasýyna yqpal etetin mańyzdy bastamalar. Ár áke – tirek, ár ana – shabyt kózi bolsyn», – dedi.
Al oblystyq máslıhat depýtaty, «Ana úıi» jobasynyń úılestirýshisi jáne qamqor ana Quralaı Jumabekova otbasyndaǵy tárbıeniń balanyń tulǵa retinde qalyptasýyna tikeleı áser etetinin atap ótti.
«Búgingi sharada kópbalaly, baqytty, rýhy bıik otbasylardy kórý qýantady. Ata-ana – balanyń alǵashqy ustazy. Onyń ómirge degen kózqarasy, qundylyqtary – otbasynan bastaý alady. Mahabbatty, meıirimdi, qurmetti saqtaı bileıik. Bul – eń qundy muramyz», – dedi ol.
Resmı bólimnen keıin «Meniń januıam» atty trenıng pen otbasylyq baıqaý uıymdastyryldy. Qatysýshylar otbasylyq dástúrlerimen bólisip, kúndelikti ómir men merekelik sátterin áńgimelep, baqytty ómirdiń formýlalaryn usyndy. Bul jerde jeńilgender bolǵan joq — árbir otbasy qoshemetke, qoldaýǵa jáne qurmetke ıe boldy.
Uıymdastyrýshylardyń pikirinshe, mundaı sharalar merekelik kúntizbeni árlep qana qoımaı, otbasy ınstıtýtyn nyǵaıtýǵa baǵyttalǵan memlekettik saıasattyń mańyzdy bóligine aınalýda.
Park «Báıterek» alleıasynda alǵashqy «otbasy aǵashtary» búr jaryp úlgerse, «Mereıli otbasy–2025» baıqaýy jańa bastaý aldy. Múmkin, kelesi jyly taǵy bir otbasynyń tarıhy kúlli elge úlgi bolar.
Aıta keteıik, Astanada Jeńistiń 80 jyldyǵyna oraı «Dańq alleıasyna» aǵash otyrǵyzyldy.