Otbasy ınstıtýtyn nyǵaıtý: Aqtaýda aýqymdy aımaqtyq forým ótti
AQTAÝ. KAZINFORM — Búgin Aqtaý qalasynda otbasy ınstıtýtyn nyǵaıtý men ulttyq qundylyqtardy dáripteýge arnalǵan «Otbasy jáne qoǵam: jańa múmkindikter kezeńi» atty aımaqtyq forým ótti. Bul týraly Qoǵamdyq kommýnıkatsııa ortalyǵy málim etti.
Aýqymdy is-shara oblys ákiminiń janyndaǵy Áıelder isteri jáne otbasylyq-demografııalyq saıasat jónindegi komıssııa, «AMANAT» partııasy Mańǵystaý oblystyq fılıaly janyndaǵy Áıelder qanaty, «Analar kabıneti» qoǵamdyq qory jáne jergilikti kásipker áıelderdiń qoldaýymen uıymdastyryldy.
Forýmnyń basty maqsaty — otbasy ınstıtýtyn nyǵaıtý, ulttyq tárbıeniń mańyzyn arttyrý, sondaı-aq memlekettik qurylymdar men azamattyq qoǵam arasyndaǵy ózara seriktestikti jańa deńgeıge kóterý.
Sharaǵa elimizdiń ár óńirinen kelgen delegatsııalarmen qatar Mańǵystaý oblysy ákiminiń orynbasary Abbat Órisbaev, ardaqty ana, halyq emshisi Qalamqas Kúlbaraqova, psıholog, alty kitaptyń avtory Eljas Ertaıuly, Qyzylorda oblysyndaǵy «Anaǵa taǵzym» ortalyǵynyń dırektory, «AMANAT» partııasy Qyzylorda oblystyq fılıaly janyndaǵy Áıelder qanatynyń tóraıymy Altynaı Moljanova, «Astana» telearnasynyń bas prodıýseri, kópbalaly ana Meıramgúl Mádáli, ulttyq jáne óńirlik komıssııa músheleri, qoǵam qaıratkerleri, kásipkerler, kópbalaly analar, bilim salasynyń ókilderi qatysty.
Aıta keteıik Qazaqstanda 131 Otbasyn qoldaý ortalyǵy bar. Bir jyl ishinde Otbasyn qoldaý ortalyqtaryna ómirlik qıyn jaǵdaıǵa tap bolǵan 45 myńnan astam qazaqstandyq júginip, quqyqtyq, psıhologııalyq jáne áleýmettik keńes aldy. 15,4 myń otbasyǵa keshendi kómek kórsetildi.
Sonymen qatar OQO-lar arnaıy ádisteme boıynsha nekege turýǵa ótinish bergen azamattardy tegin oqytýdy bastady. Qazirde 300-den astam jup oqýdan ótti.