«Otbasy bankke» resmı mártebe beriledi

ASTANA. KAZINFORM – «Otbasy bankke» ulttyq damý ınstıtýty mártebesi beriledi. Ónerkásip jáne qurylys mınıstrligi osyndaı Úkimet qaýlysynyń jobasyn jarııalady.

«30 qazanda QR Parlamentiniń Májilisi «Qazaqstan Respýblıkasynyń keıbir zańnamalyq aktilerine turǵyn úı saıasatyn reformalaý máseleleri boıynsha ózgerister men tolyqtyrýlar engizý týraly» Zań jobasyn qabyldady. Zań jobasy aıasynda Otbasy bankine azamattardy esepke qoıý jáne ony júrgizý, sondaı-aq turǵyn úıdi bólý jónindegi jergilikti atqarýshy organdardyń fýnktsııalaryn bere otyryp, ulttyq damý ınstıtýty mártebesin berý usynylady», - dep jazylǵan qujattyń túsindirme jazbasynda.

Zańnamadaǵy ózgeristi iske asyrý úshin mınıstrlik «Otbasy bank «Turǵyn úı qurylys jınaq banki» aktsıonerlik qoǵamyna ulttyq damý ınstıtýty mártebesin berýdi usynyp otyr.

Eske salaıyq, atalǵan zań jobasy boıynsha baspana kezegine qoıý, kezektiń saqtalýyn qadaǵalaý, kezektegilerge turǵyn úı úılestirý jumystary «Otbasy bank» pen sonyń janynan qurylatyn Turǵyn úımen qamtý ortalyǵyna beriledi.

Qujatty Májilis Senat usynǵan ózgeristermen birge qabyldap, Prezıdentke joldaǵan bolatyn.