«Otbasy bank» arqyly 62 298 qazaqstandyq baspanaly boldy
2023 jyldyń qorytyndysy boıynsha jańa nemese burynnan jınaq shottarynyń ıeleri memleket tarapynan 20% kóleminde syılyqaqy alady. Bul týraly Óńirlik kommýnıkatsııalar qyzmeti alańynda Almaty qalasynyń «Otbasy bank» AQ dırektory Danagúl Túsipova aıtty, dep habarlaıdy Kazinform.
Spıker keltirgen málimetke saı, 2023 jyly Almatynyń 11 200 turǵyny Otbasy banktiń kómegimen qonys toıyn toılady. Taǵy 24 500 qala turǵyny depozıt ashyp, bolashaqta qoljetimdi sharttar boıynsha turǵyn úı satyp alý úshin qarajat jınaı bastady.
Banktiń jyldyq 2% mólsherindegi syıaqysyn jáne memleket syılyqaqysyn eskergende Otbasy banktegi depozıtter boıynsha tıimdi mólsherleme jyldyq 14%-ǵa jetýi múmkin.
«Bizdiń qoldaýymyzdyń arqasynda kún saıyn orta eseppen 235 baqytty otbasy qonys toıyn atap ótedi. Bıyl Otbasy bank kómegimen óziniń turǵyn úı máselesin 62 298 qazaqstandyq sheshti», - dep atap ótti ol.
Aıtýynsha, Otbasy banktiń «Otbasylyq paketi» sheńberinde óz kirisińdi ulǵaıtýǵa bolady.
«Ol úshin Siz otbasynyń birneshe múshesine depozıt ashýyńyz kerek, sonda syılyqaqy ár salymǵa esepteledi. Mysaly, eger otbasy aıyna belgili bir somany únemdeýdi josparlaǵan bolsa, onda otbasy ony «Otbasylyq paket» sheńberinde birneshe salym arasynda bólý arqyly ár salym úshin memleket syılyqaqysyn alatyn múmkindikke ıe bolady. Sodan keıin qajetti somanyń jınaqtalýy tezirek bolady», - dep túsindirdi spıker.
Bank salymshysy jyljymaıtyn múlikti satyp alý týraly sheshim qabyldaǵannan keıin bir otbasynyń barlyq shottaryn biriktirip, qaryz alýyna bolady.
«Búgingi tańda qazaqstandyqtar úshin eń qoljetimdi qaryz túri – turǵyn úı qaryzy. Mundaı qaryz shotta keminde 3 jyl merzim ishinde turǵyn úı qunynyń keminde 50%-y jınaqtalǵan jaǵdaıda beriledi. Qalǵan somanyń 50%-yn klıent jyldyq 3,5%-dan 5%-ǵa deıingi mólsherleme (JTSM 3,6%-dan bastap) boıynsha alady»,- deıdi Danagýl Túsipova.
Spıkerdiń sózinshe, qarjy jınaqtaý múmkindigi qazaqstandyq otbasylarǵa turǵyn úı máselesin sheshýge kómektesedi.
Syılyqaqy tóleýge arnalǵan qarajat jyl saıyn respýblıkalyq bıýdjette kózdeledi. Ótken jyldyń qorytyndysy boıynsha 1,9 mln qazaqstandyq 75 mlrd teńge kóleminde memleket syılyqaqysyn aldy.
«Memleket syılyqaqysy 200 AEK (2023 jyly 1 AEK 3 450 teńgege teń) nemese 690 000 teńgeden aspaıtyn somaǵa esepteledi. Eger osy jyl ishinde Otbasy banktiń depozıt ustaýshysy osy qarajatty óz shotyna jınasa nemese olardy bir mezgilde engizse, onda ol 2023 jyldyń qorytyndysy boıynsha eń joǵary syılyqaqy – 138 000 teńgeni alady, ol úshin bank salymshylary óz depozıtterin 2023 jyldyń 29 jeltoqsanyna deıin tolyqtyryp úlgerýleri kerek»,- deıdi Otbasy banktiń Almaty qalalyq fılıalynyń dırektory Danagýl Túsipova.
