Otarda komaǵa túsken sarbaz esin jıdy
ASTANA. KAZINFORM – Jambyl oblysy Otar aýylynda áskerde júrip komaǵa túsken 19 jastaǵy sarbaz esin jıdy. Bul týraly sarbazdyń ákesi Tımýr Janalın óziniń Instagram-daǵy paraqshasynda málim etti.
«Uzaq ýaqyt boıy bizge jan-jaqty qoldaý kórsetip, ulymyz úshin duǵa etkenderdiń bárine taǵy da alǵysymyzdy bildirgimiz keledi. Biz sizderge ulymyzdyń komadan shyqqany týraly qýanyshty jańalyqty jetkizýge asyqpyz. Qazir dárigerler aıtqandaı, ol sańyraý kúıde. Bizdi tanıdy, buryn jasalǵan traheostomııaǵa baılanysty áli sóıleı almaıdy. Biraq jaǵdaıy aýyr, dıalız jasalady. Ol shamamen 6-8 saǵatty alady. Dárigerler qoldan kelgenniń bárin jasap jatyr. Sol úshin olarǵa alǵys aıtamyz», - Tımýr Janalın.
Aıta keteıik, Jambyl oblysynda sarbaz jansaqtaý bólimine túsken edi. Oqıǵa 9 maýsym kúni bolǵan. Jambyl oblystyq densaýlyq saqtaý basqarmasy baspasóz qyzmeti sarbazdyń jaǵdaıy aýyr ekenin málimdegen.
«Naýqas 9 maýsym kúni Gvardeısk áskerı gospıtalinen jedel járdem kóligimen jetkizildi. Qordaı ortalyq aýdandyq aýrýhanasyna «polısegmentaldy pnevmonııa» dıagnozymen jatqyzyldy. Oń jaqta plevrıt. 3-4 dárejeli juqpaly toksıkalyq shok. Sepsıs. Mıdyń gıpoksııalyq isinýi, tserebraldy koma 2-3. DVS sındromy. Naýqas klınıkalyq ólimdi bastan keshken. Qazirgi ýaqytta naýqastyń jaǵdaıy óte aýyr, kóptegen músheler jetkiliksizdigi baıqalady. Atap aıtqanda, tynys alý, júrek, baýyr, tserebraldy jáne ınfektsııalyq toksıkalyq shok belgileri bar. Gemofıltratsııa jáne dári-dármekpen emdeledi», - delingen habarlamada.
Prezıdent sarbazdyń komaǵa túsýine qatysty mán-jaıdy zerttep, kináli adamdardy jazalaýdy talap etti.
Qorǵanys mınıstrligi Jambyl oblysy Gvardeısk garnızonynda aýrýhanada jatqan sarbazdyń jaǵdaıyna oraı resmı málimdeme jasady.
