Otannyń berik qalqany

ASTANA. QazAqparat - 25 jyl buryn, 1992 jylǵy 13 shildede Qazaqstan Respýblıkasy Prezıdenti Nursultan Nazarbaevtyń Jarlyǵymen Táýelsiz memlekettiń derbes arnaıy qurylymy - Ulttyq qaýipsizdik komıteti quryldy, dep jazady «Egemen Qazaqstan» gazeti.

1991 jyly «qyzyl ımperııa» - Keńes Odaǵynyń qıran­dy­synda ekiushtylyq, qaýip pen kú­mán­di jaǵdaıda bizdiń egemen mem­leketimizdiń tarıhy dúnıege keldi. Naq búgingi tańda, shırek ǵa­syrdan soń, Tuńǵysh Prezı­den­ti­mizdiń Táýelsiz Qazaqstan Respýb­lıkasyn qurýdaǵy alǵashqy jáne odan keıingi jyldarǵa qabyldaǵan sheshimderiniń dáldigi men tarıhı mańyzdylyǵyn sezinýdemiz. Elbasy fenomeni, onyń stra­te­­gııalyq kózqarasy, syndarly ish­ki jáne syrtqy saıasaty qoǵam­dy sil­ki­nisterden, al elimizdi kúı­reýden saq­tady.

Ótpeli kezeń­niń barsha syn-qaterleri men qıyn­dyqtaryn eńse­rýge múmkin­dik týǵyzdy. Tarıhı ól­shemmen alǵanda qysqa merzimde Qazaq­stan álemniń básekege eń qa­bi­­let­ti 50 eliniń qataryna kirdi. Ha­lyq­­­­ara­lyq qoǵamdastyqtyń teń quqy­­­­ly múshesine, dáıekti damý, turaq­­­­tylyq pen kelisimniń ónegesine aınaldy.  Prezıdenttiń «Ulttyq qaýip­sizdik joq jerde, memleket joq» degen biregeı formýlasy búgingi kún­­niń ustanymyna sáıkes, óziniń ámbe­­bap­tyǵyn da kórsetýde. Nursultan Ábishulynyń erik-ji­geri men stra­tegııalyq kóz­qarasy búkil elimiz úshin de jáne óziniń jańa tarı­hyn 1992 jyl­ǵy 13 shildeden bas­taǵan derbes arnaıy qurylym - ult­tyq qaýip­sizdik organdary úshin de taǵdyr­sheshti boldy.

Sol kezde, 25 jyl buryn, barlyǵyn is júzin­de «taza paraqtan» bastaýǵa týra keldi, UQK jumysyn saıası jáne ope­ra­tıvti jaǵdaılardaǵy qıyn ári ser­pindi ózgerister ahýa­lynda, Qazaq­stannyń ómirin­degi mańyzdy múddelerine tóngen jańa syn-qaterler men qaýip­ter tusynda júrgizýge týra keldi. Munyń bar­lyǵy vedomstvo basshylyǵynan jáne jeke quram­nan jaǵdaıdy jedel tú­si­nýdi, negizgi basymdyqtardy der kezinde aıqyndaýdy, strategııany, tak­tıkany jáne jumys tásilin shuǵyl jetildirýdi, týyndaǵan problema­lardy ýaqyt ozdyrmaı sheshýdi talap etti. Elbasynyń erekshe eńbek­qor­lyǵy men erik-jigeri, aıryqsha harızmasy men ǵalamat ıntýıtsııasy Ulttyq qaýipsizdik komı­tetine kásibı tájirıbe men ıntel­lektýaldyq jáne tehnıkalyq áleýet­ti satylap jınaqtaýǵa kómek­testi. Táýelsizdik jyldaryn­da árbir adamdy, qoǵamdy jáne mem­leketti kez kelgen syrtqy jáne ishki qaterlerden qorǵaýǵa kepildik beretin ulttyq qaýipsizdikti qamtamasyz etýdiń múldem jańa júıesi quryldy. KSRO burynǵy MQK-niń perıferııalyq organy sındromynan aryla, ótken totalıtarlyq kezeńniń jutań betterin paraqtaı otyryp, jumystyń qýǵyn-súrgin tásilinen bas tartty jáne Qazaqstannyń jas arnaıy qurylymy álemniń kúshti arnaıy qurylymdarynyń úzdik dástúrleri men tájirıbelerimen qarýlandy. Sondyqtan keńestik arnaıy qurylymdardyń tarıhı murasy men Qazaqstan UQK-siniń qazirgi zamanǵy qyzmetiniń arasyna teńestirý belgisin qoıý túbirimen durys emes. Ulttyq qaýipsizdik organdary táýelsizdiktiń tańsári sha­ǵynda quryldy, elimizben jáne óziniń Prezıdentimen birge da­mydy, qalyptasty. Bul jolda qıyn­dyqtar men qınalystar, sat­qyn­dyqtar men qatelikter de boldy, biraq olar bizdi kúsheıte tústi. Búginde UQK - memlekettiń ulttyq múddeleri men óńirlik qaýipsizdiktiń negizderin senimdi túrde kúzetetin qazirgi zamanǵy, yqsham ári tıimdi arnaıy qyzmet.

Onyń tarıhy - Elbasynyń tabysty kóshbasshylyǵynyń tarıhy. Elimizdiń basty arnaıy qurylymynyń táýelsizdiktiń alǵashqy kúnderinen bastap damýy Nursultan Ábishulynyń aı­ryq­sha nazary men udaıy qoldaýynda boldy. 25 jyl ishinde UQK organdary qyzmetiniń, qaýipsizdikti qamtamasyz etý júıesindegi olardyń róli men ornynyń quqyqtyq negizderi zańmen bekitildi. Birqatar zań­na­malyq jáne zańǵa qarasty akti­ler, onyń ishinde «Ulttyq qaýip­sizdik týraly», «Arnaıy memle­kettik organdar týraly», «Qarsy barlaý qyzmeti týraly», «Memlekettik shekara týraly», «Terrorızmge qarsy is-qımyl týraly», «Memlekettik qupııalar týraly» zańdar qabyldandy. 15 jyl buryn Memleket basshysy UQK-ge kelip, onda arnaıy qyzmet jumysy qalaı qurylýy kerektigi týraly óziniń kózqarasy men basymdyqtaryn belgilep berdi. Ýaqyt kórsetkendeı, bular qazirdiń ózinde ózekti. Elbasy: «Múmkindikke qaraı biz sizderdi tıisti qural-jabdyqtarmen qamtamasyz etip, joǵary bilikti kadrlarmen jasaqtadyq. Bizdiń bárimizge jańa jaǵdaılarǵa, jańa túsinikterge úırenýge týra keldi. Bizdiń bárimiz «bir shıneldiń» ishinen shyqtyq - dástúrler boldy, onyń barlyǵy qajetke jarady, biraq bul túsinikterdi ózgertýge týra keldi. Komıtet qyzmetkerlerine ońaı bolǵan joq. Men qazaqstandyq arnaıy qurylymdar qyzmetin regla­ment­teıtin quqyqtyq bazanyń qury­lýyna erekshe mán berdim. Ulttyq qaýipsizdik organdary basqa da quqyq qorǵaý qurylymdarymen birlesip, zańnyń ústemdigin, adam­nyń, qoǵamnyń jáne memlekettiń múddelerin qorǵaýdy senimdi túr­de qamtamasyz etti. Jańa, táýelsiz Qazaqstan UQK-siniń túbegeıli ózgesheligi osynda. Búginde sizder eń kúrdeli memlekettik mindetterdi sheshýge tartyldyńyzdar, al qaýipsizdik organdarynyń aldynda bul mindetter az emes. Ýaqyt jańa syn-qaterler men qaýipterdi alǵa tartýda, arnaıy qurylymdar oǵan der kezinde yqpal etýi tıis», - degen bolatyn. Elbasy jańa memlekettilikti qura otyryp, memlekettik saıasatty iske asyrýdyń mańyzdy qural­dary­nyń biri retinde arnaıy qury­lymnyń fýnktsıonaldyq rólin naqty kórdi jáne túsindi, ozyq halyq­aralyq tájirıbeni eksheýge kó­mektesti. Sondyqtan da búginde UQK onyń jumysynyń bar­lyq aspektilerin jan-jaqty reg­lament­teıtin jáne alǵa qoıǵan mindetterdi tıimdi sheshýge múm­kindik týǵyzatyn quqyqtyq tuǵyr­namaǵa ıe. Ulttyq qaýipsizdikti qam­tamasyz etý salasynda mem­lekettik baǵdarlamalar, olar­dyń qatarynda mańyzdy sanalatyn Terrorızmge jáne dinı ekstremızmge qarsy kúres jónindegi memlekettik baǵdarlama iske asyrylýda. UQK organdarynyń kúsh-jigeri, sondaı-aq, Prezıdenttiń jyl saıynǵy Qazaqstan halqyna Jol­­daýynda jáne basqa da baǵdar­lama­lyq qujattarynda aıtyl­ǵan mindet­terdi iske asyrýǵa jumyl­dyrylǵan.  Elbasynyń shırek ǵasyrlyq dana ári sarabdal saıasatynyń nátı­je­sinde múddeli kúshter Qazaqstan mingen qaıyqty shaıqap, elimizdiń dáıekti demokratııalyq jáne ekono­mıkalyq damý baǵytyna keri áser ete alǵan joq. Memleket basshy­synyń strategııasyna saı UQK, ózge de memlekettik organ­darmen birge, ishki saıası turaq­tylyqty, ultaralyq jáne kon­fes­sııaaralyq kelisimdi saqtaýdy qam­tamasyz etip otyr.  Búginde Qazaqstan men UQK or­gandary alǵash ret halyqaralyq terrorızm jáne dinı ekstremızm sekildi qubylystarmen betpe-bet keldi. Biz atalǵan toptarmen kúreste joldastarymyzdyń ómir­lerin qurban etip, asa aýyr sabaq aldyq.

Sol joly Pre­zı­dent naqty tapsyrma - qazaq­standyqtardy osy qaýip-qater­lerden qorǵaý týraly mindet qoıdy. Qysqa merzim ishinde UQK organdary durys qory­tyndylar jasap, jaǵdaıdy baqylaýlaryna aldy. Elimizde terrorlyq ınfraqurylymdar qurý áreketi júzege asyrylmaı tastalsa, birqatar lańkestikterge daıyndyqtyń joly kesildi. Sońǵy 10 jyl ishinde ǵana UQK-niń terrorızmge qarsy qyzmeti terrorlyq sıpattaǵy 100 shaqty zorlyq-zombylyq aktsııasynyń aldyn aldy. Halyqaralyq terrorlyq uıymdardyń Qazaqstanǵa qaraı umtylystary joqqa shyǵaryldy. Kúrdeliligi jaǵynan biregeı operatsııalar júzege asyrylyp, «Ortalyq Azııa modjahetteriniń ja­maaty», «Djýnd-ál-Halıfat», «Hızb-ýt-Tahrır» jáne basqa da qury­lymdar joıyp jiberildi. Árip­tes arnaıy qyzmettermen birge onda­ǵan terrorshylar men ekstremıster izdep tabylyp, ekstradıtsııalandy.  Osy operatsııalardyń tabys­ty bolýyna 160-tan astam antı­terrorlyq jáne jedel-áskerı sharalar ótkizgen arnaıy maq­sattaǵy «A» qyzmetiniń qyzmet­kerleri úlken úles qosty. Olardyń kópshiligi batyldyq pen batyrlyqtyń eren úlgisin kórsetkenderi úshin memlekettik nagradalarǵa ıe bolsa, ókinishke qaraı, keıbireýleri opat boldy. Qazir arnaıy maqsattaǵy «A» qyzmeti eń zamanaýı qarý-jaraq, ekıpırovka jáne tehnıka úlgilerimen jaraqtanǵan joǵary kásibı bólimshe bolyp tabylady. Onyń jaýyngerleri - arnaıy qyzmettiń súzgisinen ótken betke ustarlary deýimiz kerek. Olar kún demeı, tún demeı asa kúrdeli áskerı mindetterdi sheshýge qabiletti. Muny 2016 jyldyń jeltoqsan aıynda atalǵan qyzmette bolǵan kezinde Memleket basshysynyń ózi erekshe atap kórsetti. Sol joly Elbasy «A» qyzmetiniń jeke quramymen áńgime-dúken quryp, bólimsheniń materıaldyq-tehnıkalyq bazasymen tanysqan bolatyn.  Prezıdenttiń ókimimen 20 jyl buryn terrorızm qateriniń óse túsip otyrǵany eskerile kelip, Qazaq­stan Respýblıkasynyń vedomstvo­aralyq Antıterrorlyq ortalyǵy (ATO) qurylǵan bolatyn. Ýaqyt Elbasynyń kóregendigi men osy qa­damnyń asa durystyǵyn kórsetip berdi. Búginde QR ATO shebinde terro­rızmge qarsy is-qımyldyń jalpy­memlekettik júıesi qurylyp, mem­lekettik jáne jergilikti atqarýshy organdardyń qyzmeti úılestirilip otyr. Osy qatarda atalǵan jumystyń quqyqtyq, uıymdastyrýshylyq jáne materıaldyq-tehnıkalyq jaǵy da tolyqtaı qamtamasyz etil­gen. ATO-nyń bastamasymen terro­rızmmen jáne dinı ekstremızmmen kúrestiń 3 memlekettik baǵdarlamasy júzege asyrylsa, antı­ter­rorlyq komıssııa men jedel shtab­tar jumys isteıdi, birle­s­ken oqý-jattyǵýlary júrgi­zilip keledi. Terrorızm men ekstre­mızmniń aldyn alý sharalary kú­sheıtilip, memlekettik organ­dar­dyń Birlesken derek banki qurylǵan.  Asa iri qoǵamdyq-saıası, máde­nı jáne sport sharalarynyń qaýipsizdigin qamtamasyz etýde baǵa jetkisiz tájirıbe jınaqtaldy. Olardyń qatarynda EQYU, TMD jáne ShYU sammıtteri, Álem­dik jáne dástúrli dinder kóshbas­shylarynyń sezderi, Azıada men Ýnıversıada bar. Búginde, Memleket basshysynyń tapsyrmasy boıynsha, ATO turǵysynan EKSPO-2017 halyqaralyq ma­mandandyrylǵan kórmesiniń qaýip­sizdigin qamtamasyz etý baǵytynda jumystar júrgizilip jatyr.

Ja­qynda Aqordada Nursultan Ábish­uly «EKSPO»-nyń ashy­lý sal­tana­tynyń qaýipsizdigin tıimdi qam­ta­masyz etkeni úshin basqa ve­domstvo­lar qatarynda UQK organdaryna da rızashylyǵyn bildirýin bizdiń qyzmetkerlerimiz maqtanysh etedi.  «Kóptegen memleket basshylary men basqa da meımandardyń qatysýymen ótken «EKSPO-2017»-niń ashylý saltanatyn qam­­ta­masyz etken elimizdiń búkil po­­lıtsııa qyzmetine, Ulttyq qaýip­­­sizdik komıtetine, «Syrbar» syrt­qy barlaý qyzmetine jáne basqa da or­gandarǵa alǵys jarııalaǵym ke­le­di», - dedi Qazaqstan Prezı­denti.  Senim kim-kimdi de qanat­tan­dyrady. Bizge myna másele de asa mańyzdy - biz zor bedelge ıe jáne tıimdi de sheshimdi is-qımyl tanyta alatyn saıasatkerdiń komandasynda jumys isteımiz. Sondyqtan, UQK organdary tarapynan Prezıdent pen basqa da ınstantsııalardy ulttyq múddege yqtımal qaterler týraly turaqty negizde aqparattandyryp otyrý qamtamasyz etildi. El bas­shylyǵy dáıekti saıası sheshimder qabyldaý úshin negiz bolǵan mańyz­dy málimetterge qol jetki­zilip keledi. Ótken 25 jyl ishinde bizdiń qarsy barlaýshylary­myz jetkilikti deńgeıde tájirıbe men ma­shyqtarǵa ıe boldy. Memle­kettik qupııalardy qorǵaýdyń, barlaý-búldirý áreketi men Qa­zaqstannyń ishki isine zańsyz aralasýǵa qarsy turýdyń ózindik júıesi qalyptasty. Birqatar shpıondyq áreketter men jekelegen sheteldik arnaıy qyzmetter men uıymdardyń memlekettik or­gandarǵa synalap kirip, qupııa aqparattarǵa qol jetkizý josparlarynyń joly kesildi.  «Sapfır» jáne «Vıktorııa» qarsy barlaý operatsııalary asa joǵary deńgeıde ótkizildi. 2007 jyly AQSh Prezıdenti Dj.Býsh: «AQSh tarıhynda ıadrolyq taratpaý isinde Qazaqstannan asqan áriptes ázirshe bolǵan emes», - dep kezdeısoq aıtpasa kerek. 

Qazaqstannyń jahandyq qaýipsizdik problemalaryn sheshýdegi óńirlik kóshbasshylyǵy men belsendi ustanymy UQK qyzmetkerlerin elimizge syrttan teris yqpal etýge, respýblıka bastamalarynyń bedelin túsirýge baǵyttalǵan is-áreketterge tosqaýyl qoıýda preventıvti sharalar qabyldaýǵa umtyldyrady. Kez kelgen arnaıy qyzmetter sekildi UQK aldynda da yqtımal qaýip-qaterler men janjaldardy der kezinde anyqtap, teris stsenarıılerdiń yqtımal saldarlaryn eskertý men boljaý mindeti tur.  Álemdik ekonomıkadaǵy daǵdarysty qubylystar bıznestiń toqyrap, ınvestıtsııalardyń qysqarýyna, sóıtip, halyqtyń ál-aýqatynyń tómendeýine táýekelderdi kúsheıte túsip otyr. Sondyqtan, ulttyq qaýipsizdik organdary Memleket basshysy reformalarynyń tıimdi júzege asyrylýyn qamtamasyz etip qana qoımaı, qoldan jasalǵan ákimshilik kedergilerdi qosa alǵanda, elimizdiń ekonomıkalyq múddesine nuqsan keltiretin faktorlardy anyqtaýmen de aınalysady. Qazirgi tańda jurt­shylyqqa memlekettik deńgeıde qabyl­danyp jatqan sharalardyń barly­ǵy ulttyń ál-aýqatyn artty­rýǵa baǵyttalǵanyn túsiný mańyzdy. 

Álemdik progress túrli salaǵa jańa tehnologııalardy belsendi iske qosqannyń ǵana upaıy túgel bolatynyn kórsetip berip otyr. Biz jahandyq óndiristik revolıýtsııanyń tabaldyryǵynda turmyz. Sondyqtan Qazaqstan jahandyq úderisterdiń jańa talabyna daıyn bolýy tıis. Jasandy ıntellekti men avtomattandyrý, bıoınjenerııa jáne basqa da serpindi jobalar taıaýdaǵy 10-15 jyl ishinde ekonomıkanyń, eńbek narqynyń, bilim berý men áleýmettik qamsyzdandyrý júıeleriniń qurylymdaryn aıtarlyqtaı ózgertetini anyq. Keıbir baǵamdaýlar taıaýdaǵy jyldary túrli mamandyqtar 10-nan 40%-ǵa deıin múldem joıylady, bul jaıt óz kezeginde jappaı jumyssyzdyq týyndatady deıdi.  Osy úreıli boljam eldiń ekonomıkalyq áleýetin senimdi qorǵaýdy, memlekettik baǵdarlamalar men ınvestıtsııalyq jobalardy qylmystyq qolsuǵýshylyqtan arashalaý boıynsha naqty sharalar qabyldaýdy talap etedi. Buǵan birqatar rezonansty qylmystyq isterdiń ashylǵanyn jáne tek sońǵy bes jyl bederinde UQK-niń Ekonomıkalyq qaýipsizdik qyzmeti tarapynan 2,4 trln teńgeden astam somany quraıtyn qylmystyq áreketterdiń joly kesilip, memleketke 80 mlrd-tan astam teńgeniń qaıtarylǵanyn mysal retinde keltirýge bolady.  Transulttyq uıymdasqan qylmys pen halyqaralyq esirtki saýdasyna aıtarlyqtaı soqqy berildi. UQK júzege asyrǵan aýqymdy sharalar men sheteldik áriptestermen birlese qolǵa alynǵan is-qımyldar nátıjesinde 120 halyqaralyq esirtki saýdalaýshy toptar joıylyp, zańsyz aınalymdaǵy 400 tonnadan astam esirtki zattary tárkilendi. 2013-2015 jyldar aralyǵynda elimizdiń quqyq qorǵaý organdary TMD-ǵa múshe elderdiń arnaıy qyzmetimen yntymaqtasa otyryp, bir mezgilde júrgizgen operatsııa barysynda «Baýyrlastar toby» («Bratskıı krýg») atty transulttyq qylmystyq uıymnyń jetekshilerin beıtaraptandyrdy. Tergeý amaldary barysynda 90 qylmystyq is qozǵalyp, onyń qorytyndysy boıynsha 59 adam sottaldy. Mundaı jaǵdaı TMD elderi tájirıbesinde alǵash ret kezdesti. 

Qazirgi tańda biz arnaıy qyzmettiń jumys tásili men pishimi qarqyndy túrde ózgerip jatqanyn kórip otyrmyz. Osyǵan oraı UQK ýaqyt talabyna saı ózgerýde. Bul degenimiz, zamanaýı aqparat quraldary, ınternet-tehnologııa, úlken kólemdegi málimetterdi taldaý, forsaıttyq zertteýler jáne uzaq merzimdi boljamdar jasaý, tájirıbe almasý men sheteldik eń úzdik arnaıy qyzmettiń jetistikterin qoldaný. Biz ulttyq múddelerimizge zalal keltirýi múmkin túrli qaýipter men táýekelderdi anyqtap, olardyń aldyn alýǵa qabiletti bolýymyz kerek. Ýaqyt ómirimizge enteleı engen vırtýaldy áleýmettik qatynastarǵa ońtaıly beıimdelýdi talap etýde. «Arab kóktemi» jáne basqa da osy ispettes jaǵymsyz úrdister álemge qas-qaǵym sátte tarap, birneshe saǵattyń ishinde jaǵdaıdy turaqsyzdandyryp jiberý múmkindigine ıe. Sondyqtan Elbasy óziniń «Qazaqstannyń Úshinshi jańǵyrýy: jahandyq básekege qabilettilik» atty Qazaqstan halqyna arnaǵan Joldaýynda: «Qaýipsizdik ahýaly qýatty jáne áreket ete alatyn memlekettiń ólshemine aınalyp keledi», dep atalǵan máselege mańyz berýi kezdeısoqtyq emes. Jahandyq jańa syn-qaterlerdiń ishinde bizdiń elimizdi de aınalyp ótpeıtin kıberqylmysqa erekshe ekpin túsirgen Prezıdent Úkimet pen Ulttyq qaýipsizdik komıtetine «Qazaqstan kıberqalqany» júıesin qalyptastyrý sharalaryn qabyldaýdy tapsyrdy.

Bıylǵy 11 shildede ótken Qaýipsizdik Keńesiniń kezekti májilisi de osy taqyrypqa arnaldy. Elbasy álemdegi jáne elimizdegi destrýktıvti terrorlyq toptar qyzmetiniń saldary nege ákelip soǵatynyna nazar aýdartyp, olarǵa qarsy tıimdi kúres júr­gizý isin jolǵa qoıýdy tapsyr­dy. Atap óterligi, bul ulttyq qaý­ip­siz­dikti qamtamasyz etý sala­syn­daǵy Elbasy tapsyrǵan aý­qymdy mindetterdiń bir bóligi ǵana.  Prezıdent shekarany bekemdeý jáne UQK Shekara qyzmetiniń jumysyn jetildirý máselesine de erekshe mán beredi. Elbasy bas­tamasy boıynsha orta merzimdi tıisti memlekettik baǵdarlama qabyldanyp, júzege asyrylyp keledi. Onda shekarany qorǵaý, qadaǵalaý men jabdyqtaýdyń zamanaýı júıesin engizý, áýe jáne teńiz tehnıkalaryn, shekara beketi men jasaq ınfraqurylymyn, sonyń ishinde shekara mańyndaǵy eldi mekenderdi damytýdyń bar­lyq aspektileri qamtylǵan. Osy baǵdar­lamanyń arqasynda tek sońǵy eki jylda 15 shekara beketi paıda­lanýǵa berildi, taǵy 7 zamanaýı ke­shenniń qurylysy bastaldy.

Teńiz jáne shekara qyzmetiniń avıa­parki eki jańa kememen, 6 ushaq­pen jáne bir tikushaqpen tolyqty.  Álbette, shekarashylardyń áleýmettik-turmystyq máseleleri de nazardan tys qalǵan joq. Onyń jarqyn kórinisi - UQK ShQ áskerı qyzmetshileriniń qarajatyn kóterý jónindegi Elbasynyń jaqynda shyqqan sheshimi. Osyndaı sharalar shekarashy áskerılerdiń ózine degen senimin arttyryp, rýh-jiger berip qana qoımaı, Shekara qyzmetiniń ımıdji men bedelin bıiktetetini sózsiz. Elıtalyq sheka­ra áskerleriniń qatarynda qyz­met etý kóptegen adamnyń armanyna aınaldy.  Kez kelgen júıeniń kámil bolýy, bastalǵan jumystyń sátti aıaqtalýy mamandarǵa baılanysty. Qazirgi tańda UQK-niń deńgeıi ósip, bedeli artqanyn senimmen aıta alamyz. Táýelsizdik jyldary ulttyq qaýipsizdik organdarynyń ózindik derbes negizderi men qundylyqtary qalyptasty. Olar Otanymyzǵa, halyq pen Qazaqstan Prezıdentine adal qyzmet etýge kásibı turǵyda daıyn. Bul óz kezeginde UQQ qyzmetkerleriniń kásibıligin sıpattaıdy ári qabilet-qarymyn kórsetedi. Biz 25 jyldyq tarıhymyzben, sondaı-aq, qalyptasqan dástúrimizben maqtanamyz.

Osy arada Memleket basshysynyń «Bolashaqqa baǵdar: rýhanı jańǵyrý» maqalasynda «Kúlli jer júzi bizdiń kóz aldymyzda ózgerýde. Álemde baǵyty áli bulyńǵyr, jańa tarıhı kezeń bas­taldy. Kún sanap ózgerip jatqan dúbirli dúnıede sana-sezi­mimiz ben dúnıetanymymyzǵa ábden sińip qalǵan taptaýryn qaǵıdalardan arylmasaq, kósh basyndaǵy eldermen terezemizdi teńep, ıyq túıistirý múmkin emes. Ózgerý úshin ózimizdi myqtap qolǵa alyp, zaman aǵymyna ıkemdelý arqyly jańa dáýirdiń jaǵymdy jaqtaryn boıǵa sińirýimiz kerek», dep jazǵany eske túsedi. 

Halyqaralyq qalyptasqan jaǵdaılarǵa baılanysty UQK mekemeni jańǵyrtý jáne rebrendıng jasaý jumystaryn jalǵas­tyryp keledi. Zaman talaby eli­mizdiń aldyna jańa synaq­tar qoıyp otyr. Bul jaıt qaýip­sizdik qyzmetiniń qyraǵy­lyǵyn, utqyrlyǵyn, tehnıkamen jab­dyqtalýyn jáne erekshe sheshim qabyldaýyn qajet etedi. Biz aldyn ala áreket jasaýdy meńgerdik jáne búginde UQQ kez kelgen tapsyrmany oryndaýǵa ázir ekenin aıta alamyz. Buǵan bizdi Qazaqstan halqy men Prezıdentiniń senimi mindettegen.  Ulttyq qaýipsizdik komıtetiniń 25 jyldyq mereıtoıyna oraı, barsha jeke quram men ardagerlerdi kásibı merekesimen quttyqtaı otyryp, olarǵa zor densaýlyq, otbasy amandyǵy men jańa tabystar tileımin.  Kárim MÁSІMOV, Qazaqstan Respýblıkasy UQK tóraǵasy