Otandyq kitap basý sektory toqyraý jaǵdaıynda tur - T. Ómirzaqov
«Otandyq kitap ındýstrııasyndaǵy asa mańyzdy másele - Qazaqstannyń kitap naryǵynyń sheteldik naryqqa tolyǵymen táýeldi bolýy. El naryǵyndaǵy 80 paıyzǵa deıingi ádebıetti reseılik ónimder qurap otyr. Otandyq kitap basý sektory toqyraý jaǵdaıynda tur. Qazaqstannyń kitap palatasynyń málimetterine qaraǵanda, búgingi jumys istep turǵan 360 kitap baspasy jylyna 5 myń kitap qana basyp shyǵarady. Jalpy taralymy 16 myń dananyń mańynda ǵana. Sonda da bunyń aıtarlyqtaı bóligin, ıaǵnı 35 paıyzdan astamyn oqýlyqtar, 20 paıyzyn ǵylymı baspalar, 13 paıyzyn kórkem ádebıet qurap otyr», - deıdi depýtat T. Ómirzaqov.
Onyń aıtýynsha, qazaqstandyq naryq búgingi tańda tek reseıden ımporttalmaıtyn ónimderdi ǵana shyǵarýmen shektelip keledi. Bul rette depýtat qaǵaz baǵasynyń qymbat bolýy men onyń shetelden ımporttalýy qazaqstandyq baspa óniminiń ózindik qunyn áldeqaıda qymbattatyp turǵanyn aıtady. Máselen, qazirgi tańda shetelden ákelinetin qaǵaz ben kartonǵa kedendik baj shamamen 15 paıyzdy quraıdy eken. Sonymen bir mezgilde, daıyn baspa ónimderiniń ımportyna kedendik baj «0» teńgeni quraıdy. Mundaı faktor zamanaýı qazaqstandyq ádebıetke barynsha áser etip otyr.
«Kitap isine jetkilikti nazar bolmaýy jaqyn keleshektegi jaǵymsyz saldarǵa ulasýy ábden múmkin. Onyń ishinde sheteldik baspa qazaqstandyq ónimderdi naryqtan tolyǵymen yǵystyryp shyǵarý qaýpin de týǵyzyp otyr. Keden odaǵy aıasyndaǵy damýda bul problema onan saıyn órship barady. Kerisinshe, reseılik baspa kompanııalary úshin qazaqstandyq naryqta eshqandaı báseke joq. Sondyqtan da, otandyq kitap salasyna, onyń ishinde kitap basý isine tolyq saraptama jasalsa. Sonymen qatar, otandyq kitap basý isine memlekettik saıasatty yntalandyratyn tetikterdi zańnamalyq deńgeıde qabyldasaq ıgi», - dedi T. Ómirzaqov.
