Otandyq taýar óndirýshilerdiń tizilimi jasalady – Májilis
ASTANA. KAZINFORM – Májilis «taýarlardyń shyǵarylǵan elin aıqyndaý máseleleri boıynsha ózgerister men tolyqtyrýlar engizý týraly» zań jobasyn birinshi oqylymda maquldandy. Zań jobasymen Ekologııa máseleleri jáne tabıǵat paıdalaný komıtetiniń múshesi Dúısenbaı Turǵanov tanystyrdy.
Onyń maqsaty — qazaqstandyq taýar óndirýshilerdi durys sáıkestendirý, taýar jáne ony óndirýshi týraly aqparatqa biryńǵaı qol jetkizý, sondaı-aq memlekettik qoldaý sharalardy arttyratyn tizilimdi engizý.
Atalǵan zań jobasy Prezıdenttiń 2023 jylǵy Joldaýyn iske asyrý aıasynda ázirlendi, ıaǵnı ımporttyq taýarlarǵa táýeldilikti tómendetý, joǵary lokalızatsııa deńgeıi bar óndiristik tsıkldy qalyptastyrý, zamanaýı tehnologııalardy jetkizý, olardyń transferti men jańa óndiristerdi lokalızatsııalaý.
— Qazir qoldanysta úsh túrdegi sertıfıkat bar, ol «ST-KZ», ındýstrıaldy sertıfıkat jáne eksporttyq taýar shyǵý sertıfıkattary. Bul sertıfıkattardy «Atameken» kásipkerlerdiń ulttyq palatasy beredi. Zań jobasy aıasynda qazaqstandyq taýar óndirýshilerdiń tizilimin engizý josparlanýda, ol qoldanystaǵy barlyq óndirýshiler tizimin biriktirip, «ST-KZ» sertıfıkattary men ındýstrıaldy sertıfıkattardy fýnktsıonaldy túrde almastyrady, — dedi Dúısenbaı Turǵanov Májilis otyrysynda zań jobasyn tanystyra turyp.
Onyń aıtýynsha, qazir sertıfıkattaý protsesi edáýir ýaqyt alady jáne qarjy shyǵyndaryn talap etedi, bul shaǵyn jáne orta bıznes úshin qıyn. Jańa sertıfıkattar aqyly jáne jeke sarapshylardyń qorytyndysy negizinde beriledi.
— Qazir usynyp otyrǵan tizilimge kásiporyndar aqysyz engiziledi jáne oǵan qosylý merzimi boıynsha shekteýler bolmaıdy, bul bıznes úshin ýaqyt pen qarajatty únemdeýge múmkindik beredi. Ázirlenip jatqan tizilim ST-KZ sertıfıkattary men ónerkásiptik sertıfıkatty berý tártibimen baılanysty anyqtalǵan kemshilikterdi eskere otyryp, taýar óndirisin rastaý júıesin jetildirýge baǵyttalǵan. Qazir sertıfıkattaý protsesi joǵary deńgeıdegi adamı faktor yqpalyna ıe jáne memlekettik aqparattyq júıelermen, óndirýshilerdiń biryńǵaı derekqory joq. Bul sertıfıkattaý protsesiniń ashyqtyǵyna qaýip tóndiredi, — deıdi ol.
Jańa tizilim tolyqqandy aqparattyq júıe bolady jáne qujattardy saraptama ótkizý úshin memlekettik aqparattyq júıelermen biriktiriledi.
Tizilimdi júrgizýge jaýapty ýákiletti memlekettik organ — Ónerkásip jáne qurylys mınıstrligi. Tizilimdi qalyptastyrý jáne júrgizý birneshe kezeńnen turady: ótinish berý, tsıfrlyq verıfıkatsııalaý, óndiristi baǵalaý jáne tizilimge qosý nemese qospaý týraly sheshim qabyldaý.
Tizilimdi engizý Qazaqstanda jumys isteıtin taýar óndirýshileri týraly ózekti aqparatqa qol jetkizýdiń biregeı negizin qurýǵa múmkindik beredi.
— Qazir taýar toptaryn ýákiletti memlekettik organdarǵa bekitý, ulttyq klassıfıkatordy jańartý boıynsha salalyq jáne vedomstvoaralyq komıssııa qurý pysyqtalyp jatyr. Sondaı-aq taýar, jumys, qyzmet standarttary jáne júıeli tizimge kóshý úshin qajetti quraldardy jasaý jumystary júrgizilýde. Zań jobasyn qabyldaǵannan keıin qazaqstandyq taýarlar tizilimin engizý boıynsha normatıvtik quqyqtyq aktiler ázirlenedi. Zań jobasyn qabyldaý ekonomıkalyq, áleýmettik, quqyqtyq nemese ekologııalyq teris saldarlarǵa ákelmeıdi, — dep tolyqtyrdy D. Turǵanov.
Byltyr jyl sońynda Úkimet basshysy Oljas Bektenov otandyq taýar óndirýshilermen jasalǵan kelisimsharttar artyp kele jatqanyn aıtqan edi.