Otandyq ónimder dúken sórelerinde qanshalyqty qamtylǵan

ASTANA. KAZINFORM – Qazirgi kezde elimizdegi dúken sórelerindegi azyq-túliktiń neshe paıyzy otandyq óńdirýshilerge tıesili? Bul suraqqa Saýda jáne ıntegratsııa mınıstrligi jaýap berdi.

- Mınıstrlik otandyq taýar óndirýshiler (OTÓ) ónimderiniń saýda jelileriniń sórelerinde usynylýyna taldaý júrgizdi. Taldaý áleýmettik mańyzy bar azyq-túlik taýarlarynyń (ÁMAT) 31 ataýy boıynsha júrgizildi. Taldaý nátıjesinde (bıylǵy 6 aqpandaǵy jaǵdaı boıynsha) mynalar anyqtaldy: Qazaqstanda óndirilgen taýarlardyń úlesi 83%-dy qurady. Bul rette, Reseı Federatsııasy óniminiń úlesi – 11,5%, Belarýs Respýblıkasy óniminiń úlesi – 1,9%, Ýkraına óniminiń úlesi – 0,55%, Qyrǵyzstan óniminiń úlesi – 0,45%, AQSh óniminiń úlesi – 0,01%, al ózge elder óniminiń úlesi 2,59%-dy quraıdy, - delingen mınıstrliktiń Kazinform agenttigine bergen jaýabynda.

Otandyq ónimniń neǵurlym joǵary úlesi mynadaı taýar pozıtsııalary boıynsha baıqaldy: pııaz – 100%, birinshi surypty bıdaı unynan pisirilgen nan – 99,7%, sábiz – 97%, taýyq jumyrtqasy – 95%, kartop – 94%, birinshi surypty bıdaı uny – 94,3%,balyq – 93,3%, súıeksiz sıyr eti – 92,5%, et farshy – 91,2%.

- Et, sút jáne kókónis ónimderiniń basym bóligi boıynsha otandyq taýarlardyń úlesi 70–90 paıyzdan asady, bul ishki óndiristiń jáne ishki naryqty qamtamasyz etýdiń jetkilikti deńgeıin kórsetedi, - dep atalyp ótken vedomstvo aqparatynda.

Aıta keteıik, jaqynda Memleket basshysy otandyq óndiristiń ósýine qolaıly jaǵdaı jasaýdy tapsyrdy.