Otandyq mashına jasaýshylarǵa shıkizat qunyn tómendetý usynyldy
ASTANA. KAZINFORM – Otandyq ónim óndiretin kásiporyndarǵa uzaq merzimge qarjat bólý máselesin pysyqtaý qajet. Bul búgin Senattyń jalpy otyrysynda «2025 – 2027 jyldarǵa arnalǵan respýblıkalyq bıýdjet týraly» Zańyn talqylaý kezinde palata tóraǵasy Máýlen Áshimbaev málim etti.
«Dúısenbi kúni biz Qostanaı qalasynda mashına jasaý salasyn damytý máselelerine arnalǵan dóńgelek ústel otyrysyn ótkizdik, oǵan depýtattar men memlekettik organdardyń ókilderi qatysty. Sol jerde biraz másele kóterildi. Kásiporyn ókilderi kóterip otyrǵan máselege toqtalsaq, onda uzaq merzimdi ári qoljetimdi qarjymen qamtamasyz etý týrasynda aıtyldy. Paıyzdyq mólsherlemeniń joǵary bolýy, banktermen jumys isteýdi qıyndyǵy jóninde sóz qozǵaldy», - dedi M. Áshimbaev.
Sonymen qatar Senat tóraǵasy Parlamentte qaralyp jatqan bıýdjette keler jyly Ónerkásipti damytý qorynyń qarjysy azaıǵanyn atap ótti.
«Endi onyń tıisti sebepteri bolǵan shyǵar. Kásiporyndardy qarjylandyryp otyrǵan negizgi ınstıtýttardyń biri osy ǵoı?! Osy qordyń qarjysyn aldaǵy ýaqytta kóbeıtýdi qarastyrý oryndy bolady», - dedi ol.
Munymen qosa Máýlen Áshimbaev otandyq mashına jasaýshylar kóterip otyrǵan taǵy bir máselege toqtaldy.
«Bul taqyryp shıkizatpen qamtamasyz etýge qatysty. Árıne, qazir elimizde shıkizatty óńdeý deńgeıi kóterilip jatyr. Alaıda otandyq óndeýshiler biraz shıkizat boıynsha ken óndirýshilerden satyp alyp jatqan baǵasy joǵary ekeni aıtylyp jatyr. Qalyptasqan tártip aıasynda osyndaı ken óndirýshiler halyqaralyq baǵalar turǵysynda 5 paıyzdyq jeńildik berip otyr. ıAǵnı London metall bırjasynyń baǵasynan 5 paıyz jeńildik eskerilgen. Bul turǵyda osyndaı jeńildik otandyq óndeýshiler úshin tym az degen másele kóterilip jatyr. Sondyqtan otandyq mashına jasaýshylarǵa, qazaqstandyq óńdeýshi ónerkásipti damytatyn kompanııalarǵa otandyq shıkizattyń qunyn ary qaraı tómendetý máselesin pysyqtaǵan jón bolar edi», - dedi Senat tóraǵasy Úkimet múshelerine qarata aıtqan sózinde.
Eske salsaq, osy aptada Senat tóraǵasy Máýlen Áshimbaev Qostanaı oblysy máslıhatynyń depýtattarymen jáne jergilikti jurtshylyqpen kezdesti.
