Salyq reformasy: Arnaıy rejımder azaıyp, talaptar ózgerdi
ASTANA. KAZINFORM — Salyq kodeksine qol qoıylǵannan keıin, Qazaqstanda túsindirý jumysy bastalyp ketti, dep habarlaıdy Úkimettiń baspasóz qyzmeti.
Qabyldanǵan qujat boıynsha alǵashqy jarııa túsindirý 18 shildede «Atameken» UKP alańynda ótti.
Premer-mınıstrdiń orynbasary — ulttyq ekonomıka mınıstri Serik Jumanǵarın jáne Palata Prezıdıýmynyń tóraǵasy Raıymbek Batalov salalyq qaýymdastyqtardyń ókilderimen oflaın jáne onlaın formatta ótken semınar-keńes aıasynda kezdesti. Іs-shara barysynda memlekettik organdardyń ókilderi bızneske jańa Salyq kodeksiniń negizgi normalaryn túsindirdi.
Qatysýshylar arasynda mashına jasaý, farmındýstrııa, qoǵamdyq tamaqtaný, bólshek saýda, densaýlyq saqtaý, salyq keńesshileri jáne basqa da birlestikter ókilderi bar. Jańa qujattaǵy negizgi ózgerister týraly habardar etýden basqa, arnaıy salyq rejımderine jáne salyqtyq ákimshilendirýdiń jańa tásilderine erekshe nazar aýdaryldy.
Ulttyq ekonomıka mınıstrligi Salyq jáne keden saıasaty departamentiniń dırektory Erlan Saǵynaev jańa kodekste arnaýly salyq rejımderiniń sany jetiden úshke deıin qysqartylǵanyn atap ótti:
— ózin-ózi jumyspen qamtyǵandar úshin,
— jeńildetilgen deklaratsııa negizinde,
— sharýa nemese fermer qojalyqtary úshin.
— Ózin-ózi jumyspen qamtyǵandar úshin ASR-dy jeke kásipker bolyp tabylmaıtyn, jumyskerlerdiń eńbegin paıdalanbaıtyn jáne osy ASR qoldanýǵa ruqsat etilgen qyzmet túrlerin júzege asyrmaıtyn jeke tulǵalar qoldanýǵa quqyly. Kúntizbelik aıdaǵy tabysy 300 AEK — ten aspaıtyndar, — dedi Erlan Saǵynaev.
Bul rette ózin-ózi jumyspen qamtyǵandar JTS-dan bosatylady jáne tabysynyń 4% mólsherinde ózderi úshin áleýmettik tólem ǵana tóleıdi. Jeńildetilgen deklaratsııanyń jańa rejıminde QQS pen áleýmettik salyqty tólemeý múmkindigi saqtalady. Ony kúntizbelik jyldaǵy tabysy 600 myń eselengen AEK-ten (2,4 mlrd teńge) aspaıtyn, jaldamaly jumysker sanyna shekteý joq jáne qyzmet túri tyıym salý túrleri tizbesine engizilmegen salyq tóleýshiler qoldanýǵa quqyly. Sharýa (fermer) qojalyqtary úshin qoldanystaǵy ASR saqtalǵan.
— Jalǵyz nárse, biryńǵaı jer salyǵynyń joıylýyna baılanysty jalpy tabystyń 0,5% mólsherinde tıesili tabys salyǵyn sharýa qojalyqtary barlyq basqa kásipkerler sııaqty JTS BSK-ǵa tóleıtin bolady. Budan basqa, maqsaty boıynsha paıdalanylmaıtyn nemese Qazaqstan zańnamasyn buza otyryp paıdalanylatyn aýyl sharýashylyǵy maqsatyndaǵy jer ýchaskeleri boıynsha jer salyǵynyń bazalyq stavkalary (jer ýchaskelerin paıdalanǵany úshin tólemaqy) 20-dan 40 esege deıin ulǵaıtyldy, — dedi Erlan Saǵynaev.
Jańa kodekste salyqtyq ákimshilendirýdi jappaı ońaılatý kózdelgen:
● eseptilik 30%-ǵa, salyq 20%-ǵa az,
● salyqtyq jeńildikter men alymdardy ońtaılandyrý,
● salyqtyq ákimshilendirýdiń jańa tásilderi.
— Salyqtyq ákimshilendirýde de tásilder ózgeredi. Búgingi kúni, eger salyq bereshegin barlyq májbúrlep óndirip alý sharasy 6 AEK sheginen bastap qoldanylsa, onda jańa Salyq kodeksinde shara qoldaný bereshek mólsherine baılanysty. Mańyzdy másele-qaryz az bolsa, bıznestiń barlyq qyzmeti buǵattalmaıdy. Eger ol 20 AEK-ke deıingi somany qurasa, onda tek salyq beresheginiń bar ekendigi týraly qulaqqaǵys jiberiledi. Eger soma 20-dan 45 AEK-ke deıin bolsa, onda habarlama jiberilip, ol ótelmegen jaǵdaıda banktik shot boıynsha shyǵys operatsııalary toqtatylyp, ınkassalyq ókim qoıylady. Eger bereshek somasy 45 AEK-ten asatyn bolsa, onda saýda-sattyqqa shyǵarylatyn múlik tizimdeledi, — dedi Erlan Saǵynaev.
Sondaı-aq boryshkerdiń debıtorlary esebinen bereshekti óndirip alý jumysy júrgiziledi. Ózin-ózi retteıtin qoǵamdyq tamaqtandyrý uıymynyń tóraǵasy Veronıka Daýgalıeva jeńildetilgen deklaratsııa rejıminde jumys isteıtin kásipkerlerdiń shyǵystar somasyn KTS shegerimńne jatqyzý múmkindigin saqtaýdy usyndy.
Qazaqstannyń qurylys salýshylar qaýymdastyǵynyń atqarýshy dırektory Vıktor Mıkrıýkov zańdy tulǵalardy tirkeýdi jaramsyz dep taný tájirıbesine alańdaýshylyq bildirip, májbúrlep joıýdyń tolyqqandy rásimin engizýdi jaqtady.
Basqa qatysýshylar da ózderin alańdatqan saýaldarǵa memlekettik organ ókilderinen tolyq jaýap aldy. Endi jańa Salyq kodeksiniń normalaryn túsindirý jumysy basqa óńirlerde jalǵasady.
Buǵan deıin habarlanǵandaı, keshe Memleket basshysy jańa Salyq kodeksine qol qoıdy.