Otandyq ǵylym men joǵary bilimdi tsıfrlandyrý protsesi qalaı júrip jatyr
ASTANA. KAZINFORM — Elimizde joǵary bilim berý jáne ǵylym salasyn tsıfrlandyrý maqsatynda biryńǵaı platforma iske qosyldy. Bul baǵyttaǵy jumys týraly tolyǵyraq Ǵylym jáne joǵary bilim mınıstrliginiń tsıfrlandyrý jáne memlekettik qyzmet kórsetý departamentiniń dırektory Nursultan Mahatov aıtyp berdi.
— Byltyr joǵary bilim salasyn ashyq, qoljetimdi ári sapaly deńgeıge kóshirý úshin úlken qadam jasaldy. Joǵary bilim berýdiń biryńǵaı platformasy iske qosyldy. Bul tek protsesterdi avtomattandyrý quraly ǵana emes — 2,6 mıllıon paıdalanýshy men myńdaǵan bilim berý baǵdarlamasyn jáne memlekettik júıelermen biriktirilgen aýqymdy tsıfrlyq ekojúıe, — dedi Nursultan Mahatov ortalyq kommýnıkatsııalar qyzmeti alańynda ótken baspasóz máslıhatynda.
Atalǵan platforma mınıstrlik qyzmetine qatysty aqparatty jınaý, saqtaý, óńdeý jáne usyný úshin qurylǵan.
Júıeniń negizgi mindeti men qyzmeti:
• Belgilengen kezeńde jáne zańda kórsetilgen merzimde joǵary bilim berý salasyna monıtorıngi júrgizý úshin esepti qalyptastyrý;
• Bilim berý baǵdarlamalarynyń tizilimin júrgizý;
• Joǵary bilim berý salasyndaǵy memlekettik qyzmetterdi avtomattandyrý;
• Platformada saqtalatyn derekter negizinde stıpendııa tóleý;
• Barlyq joǵary oqý ornynyń aqparattyq júıesin memlekettik aqparattyq júıelermen ıntegratsııalaý.
Qazir platformada 700 myńǵa jýyq stýdent, 44 myńnan astam oqytýshylar jáne 2,6 mln-nan astam túlek týraly málimet bar. Ótken jyly platformada 154 myńnan astam dıplom tirkeldi. Sonymen qatar platforma arqyly 202 myńnan astam stýdent stıpendııa alady, bıyl qańtarda shamamen 13,4 mlrd teńge tólendi.
Odan bólek, 5 memlekettik qyzmet elektrondyq formatta kórsetiledi, sondaı-aq, platformada 104 joǵary oqý ornynyń pasporty bar. Qazir platformada 8394 bilim berý baǵdarlamalarynyń derekteri bar.
— Elimizdegi barlyq joǵary oqý oryndarynyń LMS (oqytýdy basqarý júıeleri) jáne SDU, eGov, halyqqa qyzmet kórsetý, Astana Hab, jeke tulǵalardyń memlekettik derekter qory, enbek.kz, sııaqty 20-dan astam memlekettik organdardyń aqparattyq júıelerimen ıntegratsııa júrgizildi, — deıdi spıker.
Odan ári Ǵylym jáne joǵary bilim mınıstrliginiń ókili platformadaǵy jańa modýlderge toqtaldy:
— «Bilim týraly qujattardyń nómirlerin generatsııalaý» modýli;
— «Statıstıka» modýli;
— «Málimetter» modýlinde bilim alýshylar, túlekter jáne joǵary oqý oryndarynyń professorlyq-oqytýshylyq quramy týraly aqparat bar;
— «Memlekettik qyzmetter» modýli sheńberinde 5 memlekettik qyzmet kórsetý avtomattandyrylǵan, onyń 2-i proaktıvti formatta kórsetiledi;
— «Stıpendııalardy qarjylandyrý» modýli joǵary oqý oryndarynyń bilim alýshylaryna tsıfrlyq derekter negizinde stıpendııalar tóleýge arnalǵan. Platforma arqyly stıpendııanyń ashyqtyǵy men ýaqtyly tólenýi qamtylady;
— «Táýekelderdi basqarý júıesi» modýli Smart Data Ukimet aqparattyq-taldaý júıesimen ıntegratsııalaý arqyly iske asyryldy. Táýekel dárejesin baǵalaýdyń bekitilgen krıterııleri memlekettik baqylaýdy júrgizý úshin adamı faktordyń qatysýynsyz baqylaý sýbektileriniń tizimderin avtomattandyrylǵan túrde qalyptastyrýǵa múmkindik beredi;
— «JOO pasporty» modýli qurylymy, stýdentter sany, oqý baǵdarlamalary jáne ınfraqurylym týraly aqparatty qosa alǵanda, JOO týraly negizgi derekterdi jınaýdy jáne jańartýdy avtomattandyrady. Taldaý jáne sheshim qabyldaý úshin derekterdiń ózektiligi men qol jetimdiligin qamtamasyz etedi;
— Platformada «eGov-mobile» qosymshasymen biriktirilgen «Tsıfrlyq qujattar» servısi bar, bul paıdalanýshylarǵa dıplomy men stýdenttik bıletin tsıfrlyq formatta qol jetkizýge múmkindik beredi. Platformada 2,6 mıllıon dıplom týraly aqparat qamtylǵan.
— «Egov-mobile» qosymshasy arqyly dıplomdy tsıfrlyq formatta saqtaıdy jáne paıdalana alady, endi dıplomnyń qaǵaz usynýdyń qajeti joq, sondaı-aq jumys berýshige qujattyń túpnusqalyǵyn tekserý protsesin jeńildetedi;
— «Stıpendııany qarjylandyrý» modýli boıynsha, platforma stýdentterdiń derekterin jınaýdy jáne taldaýdy avtomattandyrdy, stıpendııaǵa ótinishter men qujattardy berýdi jeńildetedi. Bul protsesti jyldamdatady jáne qatelikter qaýpin azaıtady;
— Joǵary oqý oryndary usynǵan barlyq derek Ulttyq testileý ortalyǵy, Jeke tulǵalar memlekettik derekter qory, Balalardy qorǵaý komıteti men Eńbek jáne halyqty áleýmettik qorǵaý mınıstrliginiń ıntegratsııalanǵan júıeleri arqyly salystyrýdan ótedi. Platforma stýdentterge qatysty derekti naqty ýaqyt rejıminde saqtaýǵa jáne jańartýǵa múmkindik beredi.
— Bul stýdentterdiń oqý úlgerimi jáne basqa parametrleri týraly aqparattyń árqashan ózekti bolýyn qamtamasyz etedi. Qoryta kelgende platformada 8 modýl ázirlendi, 22 ıntegratsııa iske asyryldy, 2,6 mln dıplom tsıfrlyq qujattarǵa shyǵaryldy jáne 5 memlekettik qyzmet avtomattandyryldy, — dedi Nursultan Mahatov brıfıng barysynda.
Tsıfrlyq ǵylym qalaı damyp jatyr
— Tsıfrlyq transformatsııalaý strategııasyn iske asyrý sheńberinde ozyq tsıfrlyq tehnologııalardy paıdalana otyryp, ǵylymı protsesterdi jańǵyrtýǵa baǵyttalǵan mańyzdy bastamalar júrgizilýde. Mınıstrlik ǵylymnyń tsıfrlyq ekojúıesin qurýǵa, taldamalyq derekterdi jınaý jáne eldegi ǵylymdy basqarýdyń tıimdiligin arttyrýǵa múmkindik beretin ulttyq ǵylymı-taldamalyq júıe jasaýdy qolǵa aldy, — dedi Ǵylym jáne joǵary bilim mınıstrliginiń tsıfrlandyrý jáne memlekettik qyzmet kórsetý departamentiniń dırektory Nursultan Mahatov.
Onyń aıtýynsha, ǵylymnyń tsıfrlyq ekojúıesi — derekterdi jınaý, saqtaýdy avtomattandyrý, ǵylymı jáne ǵylymı-tehnıkalyq aqparatty tıimdi izdeý men tabýdy qamtamasyz etý quraly, ıaǵnı tsıfrlyq ǵylymı portal.
— Ǵylymdy damytýdyń basym baǵyttaryn bekitýden bastap ǵylymı jobalardy iske asyrýǵa qarjy bólýge deıin qarjylandyrýdyń konkýrstyq rásimderiniń negizgi protsesterin júzege asyratyn «Ulttyq memlekettik ǵylymı-tehnıkalyq saraptama ortalyǵy» avtomattandyrylǵan aqparattyq júıesiniń fýnktsıonaly keńeıtildi jáne jańǵyrtyldy. Ǵylymı jarııalanymdardy baǵalaý jáne taldaý úshin qazaqstandyq ǵylymı dáıeksóz ındeksi jumys isteıdi. Bul ǵylymdaǵy ekojúıeniń ózegi jáne ǵylymı qoǵamdastyq qyzmetiniń negizgi kózi, — deıdi ol.
Mınıstrlik ókili usynǵan málimetke súıensek, ǵylymnyń ekojúıesin qurý boıynsha atqarylǵan jumys aıasynda 8 jańa modýl ázirlendi, onyń ishinde avtomattandyrylǵan 2 memlekettik qyzmet bar. Sol sııaqty ujymdyq paıdalaný zerthanalaryn úılestirý úshin e-labs modýlinde 351 ǵylymı zerthana jáne 1288 birlik jabdyq boıynsha derek bar. Odan bólek memlekettik aqparattyq júıelermen, sondaı-aq Web of Science jáne Scopus halyqaralyq ǵylymı bazalardy qosa alǵanda 12-ge jýyq ıntegratsııa iske asyryldy.
— Bıyl ǵylymı-tehnıkalyq tapsyrmany avtomatty túrde jınaý men irikteýdi iske asyra otyryp «Ulttyq memlekettik ǵylymı-tehnıkalyq saraptama ortalyǵy» AAJ-dyń jańa nusqasyn ázirlep, iske qosýdy josparlap otyr. Sonymen qatar sheteldik sarapshylarmen sharttardy elektrondyq formatqa aýystyrý da josparda bar. Sondaı-aq ǵylym salasyna qatysty barlyq tarıhı derekti, ıaǵnı ǵylymı-zertteý ınstıtýttar, ǵalymdar, memlekettik syılyq ıegerleri týraly aqparat, akkredıttelgen ǵylymı jáne ǵylymı-tehnıkalyq qyzmet sýbektileriniń tizilimin engizý josparlanýda. Ǵylymı-zertteý, ǵylymı-tehnıkalyq jáne tájirıbelik-konstrýktorlyq jumystardy qarjylandyrýdy júzege asyratyn jer qoınaýyn paıdalanýshylardyń tizilimin tsıfrlandyrý qajet, — dep tolyqtyrdy tsıfrlandyrý jáne memlekettik qyzmet kórsetý departamentiniń basshysy N. Mahatov.
Aıta keteıik, búginde elimiz Google, Huawei, NVIDIA sekildi halyqaralyq alpaýyt kompanııalarmen yntymaqtastyq ornatyp joǵary bilim salasynda birlesip jumys istep jatyr.