Otandyq ǵalymdar jańa kún panelin daıarlap shyǵardy

ASTANA. KAZINFORM – QR Ǵylym jáne joǵary bilim vıtse-mınıstri Darhan Ahmed-Zákı otandyq ǵalymdar ázirlegen jańa kún paneli týraly aıtty, dep habarlaıdy QazAqparat tilshisi.

«Qazir bizdiń ǵalymdar ázirlegen jobalar bar. Fızıka-tehnıkalyq ınstıtýtynyń ónimi qaraǵandylyq kompanııamen birlese qazir jańa kún panelderin jasaýǵa múmkindik beretinin kórip otyrmyz», - dedi Darhan Ahmed-Zakı Parlament Májilisinde tilshiler suraǵyna jaýap bere otyryp.

Vıtse-mınıstr bul joba otandyq ónim ekenin rastady.

«Búgin biz iskerlik keńeste olardyń ónimin eksporttaý baǵyttaryn talqyladyq. Bul rette, ǵylymı ınstıtýtpen ózara is-qımyl arqyly otandyq ónimdi óndirip, ony eksportqa shyǵarýǵa múmkin bolady. Osy ónim Fızıka-tehnıkalyq ınstıtýty zertteýi nátıjesinde jasalyp otyr», - dedi mınıstrlik ókili.

Budan buryn habarlanǵandaı, búgin Parlament Májilisinde «Ǵylym jáne tehnologııalyq saıasat týraly» jańa zań jobasy tanystyryldy.