Otandyq ǵalymdar mıkroelektronıka úshin bolashaqtyń materıalyn ázirledi
ASTANA. KAZINFORM — Otandyq ǵalymdar mıkroelektronıka úshin bolashaqtyń materıalyn ázirledi. Jańa ýltra ıkemdi ótkizgish polımerler «aqyldy» bilezikterden medıtsınalyq sensorlarǵa deıin shaǵyn elektrondy qurylǵylardyń jumysyn kúrt jaqsarta alady.
NU ǵalymdary kóp fýnktsııaly úsh ólshemdi polımerlerdi sıntezdeýdiń ınnovatsııalyq ádisin tapty. Zertteýshiler endi ártúrli keýekti kompozıtti materıaldardy shyǵara alady. Sonymen qatar bul joǵary tıimdi energııa saqtaý qurylǵylaryn, sensorlardy jáne basqa da ozyq tehnologııalardy jasaý úshin jańa múmkindikter ashyp otyr.
Top jetekshisi professor Nurshat Nurajynyń atap ótýinshe, alynǵan jańa materıal mınıatıýralyq jáne tıimdi energııa saqtaý qurylǵylaryn qurýdyń bolashaǵyn ashady.
— Mıkroenergııany saqtaý qurylǵylarynyń damýy kıiletin elektronıkanyń bolashaǵy úshin óte mańyzdy. Bizdiń polımerler dástúrli materıaldardan asyp túsedi jáne shaǵyn energııany saqtaý qoldanbalary úshin aýqymdy, únemdi sheshim usynady. Olar dál Qazaqstanda óndirilýi de múmkin, — dedi ǵalym.
Jańa materıaldy smart bilezikter, bıosensorlar jáne ıkemdilik pen deformatsııaǵa tózimdilikti qajet etetin basqa da qurylǵylar sııaqty kıiletin gadjetterde qoldanýǵa bolady. Ol óziniń qasıetterin joǵaltpaı ıilýge jáne buralýǵa tótep beredi.
Zertteýshi Gúldana Jigerbaeva bolashaq materıaldyń qasıetterine toqtaldy.
— Materıaldyq ınjener retinde aqyldy materıaldardy, ıaǵnı bolashaqtyń materıaldaryn óndirýdiń masshtabtalatyn ádisterin ázirleýge tyrysamyn. Jańa tehnologııanyń basty artyqshylyǵy — onyń ámbebaptyǵy men qarapaıymdylyǵy. Keýekti polımerlerdi sıntezdeýdiń qoldanystaǵy ádisterinen aıyrmashylyǵy — bul tásil qosymsha ádisterdi, aıqastyrǵysh agentterdi nemese dıelektrıkterdi qoldanýdy qajet etpeıdi. Bul protsesti aıtarlyqtaı jeńildetedi jáne onyń qunyn tómendetedi. Biz qazirdiń ózinde ıkemdi energııa saqtaý qurylǵylaryn, gaz datchıkterin jáne sýtegi óndirý júıelerin jasaý kezinde osy ázirlemelerimizdi qoldanyp jatyrmyz. Osylaısha platformanyń tıimdiligin dáleldengen. Sıntezdiń aýqymdylyǵy materıaldardy óndiriste qoldanýǵa jol ashady, — dedi ol.
Aıta ketelik ǵalymdar áıgili «Aport» sortyn qaıta jańǵyrtpaq.