Otandyq dúkenderde ımporttyq ónim úlesi qandaı
ASTANA. KAZINFORM – QR Saýda jáne ıntegratsııa mınıstrligi Tehnıkalyq retteý jáne metrologııa komıtetiniń tóraǵasy Qýanysh Elikbaev Qazaqstannyń shekara jaqtaǵy óńirlerinde dúken sórelerinde qansha ımporttyq ónim baryn aıtty.
Spıkerdiń aıtýynsha, sórelerdegi sheteldik taýarlar sanyn ólsheý – tıisti tártip pen ádisnamany qajet etetin kúrdeli protsess.
«Biz áriptesterimizben sórelerde qansha ımporttyq taýar bar ekenin kórý úshin qazan, aqpan aılarynda shekara mańyndaǵy 4 aımaqty araladyq. Eger jappaı tutyný taýarlary týraly aıtsaq, máselen sút - sút ónimderi, shujyq - shujyq ónimderiniń 90-95% shekara mańyndaǵy óńirlerde qazaqstandyq taýarlar ekenin kórdik. Iá, irimshik sııaqty keıbir ónimderde bul paıyz óńdeý damymaǵan jerde 60-65%-ǵa deıin tómendeıdi. Jalpy, negizgi taýarlar 30%-ǵa deıin tómendedi dep aıtý durys emes», - dep jaýap berdi Qýanysh Elikbaev Ortalyq kommýnıkatsııalar qyzmetinde ótken brıfıngte.
Sonymen birge, spıker otandyq óndirýshilerge qandaı memlekettik qoldaý sharalary qarastyrylǵanyn aıtyp berdi.
«Qazir otandyq óndiristiń ósýi úshin jaǵdaı jasalýda, sýbsıdııalar berilýde. Importqa kelsek, munda memlekettik baqylaý sharalary qoldanylady. Ótken jyly memlekettik organdarmen birlesip, ahýaldyq shtab quryldy. Barlyq baqylaýshy organdar zańnama sheńberinde ákelinetin ónimniń sapasy men qaýipsizdiginiń tehreglamentterge sáıkestigin birlesip tekserip, baqylaý úshin kúsh biriktirdi», - dedi komıtet tóraǵasy.
Onyń aıtýynsha, birqatar kórshi elderden keıbir ımporttyq taýarlardy ákelýge tyıym salynǵan.
«Kúsheıtilgen zerthanalyq baqylaý sııaqty rejımder engizildi. Shamamen 10-ǵa jýyq óndirýshi taýarlardy ákelýde baqylaýǵa jáne synaýǵa jiberildi. Eger zańbuzýshylyq qaıta anyqtalsa, olarǵa múldem tyıym salynady. Shujyq ónimderi boıynsha da osyndaı sharalar júrgizilýde. Ahýaldyq shtab osyndaı algorıtmderdi ázirleıdi jáne zańnama sheńberinde barlyq sharalardy iske asyrady», - dep túsindirdi Qýanysh Elikbaev.
