Qazaqstan azamaty Japonııadaǵy ýnıversıtettiń vıtse-prezıdenti bolyp taǵaıyndaldy
ASTANA. KAZINFORM – Medıtsına ǵylymdarynyń doktory, professor Serik Meıirmanov Japonııanyń bedeldi Rıtsýmeıkan Azıattyq-Tynyq muhıt ýnıversıtetiniń (Ritsumeikan Asia Pacific University – APU) vıtse-prezıdenti (prorektory) laýazymyna taǵaıyndaldy. Bul týraly QR Ǵylym jáne joǵary bilim mınıstrligi baspasóz qyzmetiniń basshysy Oljas Berkinbaev Facebook paraqshasynda málimdedi.
APU ýnıversıteti Japonııanyń Beppý qalasynda ornalasqan.
Bul taǵaıyndaý tarıhı oqıǵa desek te bolady. Sebebi, Japonııanyń joǵary oqý ornynyń basshylyq quramyna tuńǵysh ret Qazaqstan azamaty joǵary ári jaýapty laýazymǵa kóterilip otyr. Bul jaıt professor S. Meıirmanovtyń kásibı jáne tulǵalyq qasıetteriniń joǵary deńgeıde ekenin ǵana emes, sonymen qatar qazaqstandyq ǵylym men bilim berý júıesiniń halyqaralyq deńgeıde moıyndalyp kele jatqanyn kórsetedi.
Vıtse-prezıdent laýazymyna taǵaıyndalǵanǵa deıin professor Serik Qasymhanuly APU ýnıversıtetinde akademııalyq ister jónindegi dekan (Dean of Academic Affairs) qyzmetin úsh jyl boıy tabysty atqardy. Osy kezeńde ol oqý baǵdarlamalary men ýnıversıtettegi akademııalyq ortanyń damýyna eleýli úles qosty. Onyń baı tájirıbesi men biliktiligi (MD, PhD) ony jańa basshylyq qyzmetke laıyq etti.
Professor Meıirmanov joǵary medıtsınalyq bilimdi Qazaqstanda alǵan.
PhD dárejesin Japonııada qorǵaǵan. Bul onyń týǵan elimen de, qazirgi kásibı qyzmet atqaryp júrgen elimen de tereń akademııalyq baılanysta ekenin kórsetedi.
Aıta keterlik jaıt – professor Meıirmanov Qazaqstannyń ǵylymı salasyn damytýǵa da belsendi atsalysyp keledi. Ol Qazaqstan Prezıdenti janyndaǵy Ulttyq ǵylym jáne tehnologııalar keńesiniń belsendi múshesi, sondaı-aq Ulttyq ǵylymı keńeste sheteldik sarapshy retinde jumys isteıdi.
Rıtsýmeıkan Azıattyq-Tynyq muhıt ýnıversıteti (APU) búkil álemde óziniń shynaıy halyqaralyq ahýalymen tanymal: munda 100-den astam el men aımaqtan kelgen 6000-ǵa jýyq stýdent bilim alýda, al oqytýshylar quramynyń jartysynan astamy – sheteldik mamandar. Ýnıversıtettiń basty maqsaty – jańa býynnyń jahandyq kóshbasshylaryn daıyndaý.
Óziniń taǵaıyndalýyna qatysty pikir bildirgen professor Serik Qasymhanuly:
– Bul – men úshin zor qurmet ári úlken jaýapkershilik. Vıtse-prezıdent retinde APU ýnıversıtetiniń damýyna óz úlesimdi qosa alatynyma qýanyshtymyn. Ýnıversıtet basshylyǵyna bildirgen senimi úshin alǵysym sheksiz. APU – rasymen de erekshe bilim ordasy, jáne men onyń órkendeýi úshin eńbek etýdi jalǵastyratynyma qýanyshtymyn. Sonymen qatar, halyqaralyq akademııalyq qaýymdastyqta Qazaqstandy tanystyra alatynymdy maqtan tutamyn. Bul taǵaıyndaý Qazaqstan men Japonııa arasyndaǵy ǵylymı jáne bilim salasyndaǵy yntymaqtastyqty odan ári nyǵaıtýǵa sep bolady dep senemin. Ásirese, elimizdiń Prezıdenti ǵylymdy, halyqaralyq ǵylymı zertteýler men bilim berýdi damytýǵa erekshe qoldaý kórsetip otyrǵanyn eskerý qajet, - dedi.
Professor Meıirmanovtyń Japonııanyń jetekshi halyqaralyq ýnıversıtetteriniń birine vıtse-prezıdent bolyp taǵaıyndalýy – Qazaqstan úshin úlken jetistik jáne maqtanysh, sondaı-aq halyqaralyq arenada mansap jasap júrgen otandyq ǵalymdar men mamandarǵa shabyt bereri anyq.
Serik Meıirmanov 2025 jyldyń 1 sáýirinen bastap vıtse-prezıdent laýazymyna resmı túrde kirisedi.