Osy aptada 41 munaı kenishi aýktsıonǵa shyǵarylady

ASTANA. QazAqparat – 23 jeltoqsanda 41 munaı kenishi aýktsıonǵa shyǵarylady. Bul jaıynda Úkimet otyrysynda Energetıka mınıstri Bolat Aqsholaqov málim etti, dep habarlaıdy QazAqparat tilshisi.

«Mınıstrlik jyl saıyn birinshi kezekte munaı men gazǵa geologııalyq barlaý jumysyn júrgizýge baǵyttalǵan elektrondy aýktsıondar ótkizedi. 22 shildede 21 ýchaske boıynsha bir aýktsıon ótti, onda 24 mlrd teńge somasyna eń tómengi jumys baǵdarlamasymen 12 mlrd teńge mólsherinde rekordtyq qol qoıý bonýsy alyndy», - dedi mınıstr.

Sondaı-aq, ol kelesi aýkıtsonnyń qashan ótetinin aıtty.

«23 jeltoqsanda geologııalyq qory 63,5 mln tonna bolatyn 41 ýchaskeni paıdalaný quqyǵyn berýge jáne 60 mlrd teńge somasyna eń tómengi jumys baǵdarlamasyna kezekti aýktsıon ótkiziledi», - dedi Bolat Aqsholaqov.