Óskemendik jas sýretshi sheteldik komıkster men oıyndarǵa sýret salady
ÓSKEMEN. KAZINFORM — Jas sýretshi Darııa Dıdarqyzy Óskemendegi № 45 mektepte 8 synypta oqıdy. Ol qazaqtyń salt-dástúrin, otbasylyq qundylyqtar men tabıǵattyń tamasha kórinisterin qylqalamy men qaryndashyna arqaý etedi. Kompıýter arqyly digital formatta komıkster men onlaın oıyndarǵa tapsyryspen sýret salatyny taǵy bar. Kazinform tilshisi sýretshi qyzben suhbat quryp qaıtqan edi.
— Sýretshilik qabiletińiz qalaı baıqaldy?
— Bastaýysh synypta oqyǵan kezimde sabaq arasyndaǵy úziliste qaryndashpen túrli sýret salyp otyratynmyn. Sony kórgen synyptastarym tańyrqap, joǵary baǵalaryn berip jatty. Sodan soń birde úıge kelgende ınternetten beıneleý sabaqtaryn taýyp, sýret salýdy úırene bastadym. Al 2021 jyly QR Sýretshiler odaǵynyń múshesi Qudash Dáýlethanulynyń «SURET STUDIO» atty sýret mektebine qabyldanyp, sol ýaqyttan beri tálim alyp kelemin.
— Sýretshi retinde qandaı konkýrstarǵa qatysyp kórdińiz?
— Áýeli mektepishilik, sodan soń qalalyq, oblystyq jáne respýblıkalyq baıqaýlarǵa qatysyp, júldeli oryndardy ıelendim. Esimde erekshe qalǵany — 2023 jyly Astana qalasynda 8 naýryz — Halyqaralyq áıelder kúnine arnalǵan baıqaý. Onda Qazaqstannyń túkpir-túkpirinen 3 jarym myńnan astam sýretshi óz jumystaryn usyndy. Ádil-qazylardyń sheshimimen sýretim úshinshi orynǵa laıyq dep tanyldy.
— Otbasyńyzda sýretshiler bar ma?
— Joq. Bizdiń úıde de, týǵan-týysqandarymyzdyń arasynda da eshkim sýret salmaıdy. Ózim kópbalaly otbasynyń besinshi perzentimin.
— Kóbinese qaı taqyrypta sýret salasyz? Sýretterińiz qandaı rýhanı qundylyqtardy dáripteıdi?
— Negizinen qazaqtyń salt-dástúri, otbasylyq qundylyqtar men patrıottyq, otansúıgishtik taqyryptarda sýret salamyn. Sodan soń tabıǵatty, onyń ishinde peızajdy, gúlderdi salǵandy jaqsy kóremin. «Báısheshekter» atty sýretimmen kóktem kelip, aınalaǵa jan bitkenin aıshyqtaıtyn báısheshektiń kóriktiligin, kórkemdiligin kórsetýge tyrystym. Al «Búrkitshi qyz» kartınasy arqyly halqymyzdyń qusbegilik ónerin, oǵan tek uldar ǵana emes, qyzdardyń da beıim bolǵanyn pash etkim keldi.
Sýretterdi kóbinese arnaıy stýdııada otyryp salamyn. Biraq keıde plenerge shyǵyp, saıabaqta nemese tabıǵat aıasynda sýret salatynym da bar.
Osy mamyr aıynda A. S. Pýshkın atyndaǵy Shyǵys Qazaqstan oblystyq kitaphanasynda «Báısheshek» atty sýret kórmemniń ashylý saltanaty ótti. Bári oıdaǵydaı boldy. Oǵan qala turǵyndary, ustazdarym, synyptastarym, dostarym, týystarym keldi. Maǵan qoldaý bildirgen olarǵa, kitaphana ujymyna myń alǵys! Nıet bildirýshiler bolsa kórme áli jalǵasýda. Baryp, sýretterimdi kórip, óz baǵalaryńyzdy berseńizder bolady. Kórmede barlyǵy 20-ǵa jýyq sýretim tur.
— Ózińiz qandaı sýretshilerdi úlgi tutasyz?
— Ustazym Qudash Dáýlethanulyn úlgi tutamyn. Sebebi ol maǵan kóp dúnıeni úıretti, jol nusqady. Sol kisige qarap sýret salýǵa degen qyzyǵýshylyǵym odan saıyn artyp, sheberligim shyńdala tústi. Sodan soń álbette qazaq beıneleý óneriniń negizin salýshylardyń biri, Qazaqstannyń halyq sýretshisi Ábilhan Qasteevtiń sýretterin, Gúlnar Bekberdınovanyń jáne elimizdiń basqa da tuǵyry bıik sýretshileriniń ónerlerine tamsanyp, ózime úlgi etip júremin.
— Eń uzaq jáne eń qysqa ýaqytta salǵan sýretterińiz qandaı?
— «Asyl ájem» sýretin salýǵa eń kóp ýaqytym ketti. Ol 80×80 formatyndaǵy sýret. Osyndaı úlken sýretti alǵash ret salǵandyqtan qıynǵa soqty. Áıteýir 1 aıda aıaqtadym. Al eń qysqa ýaqytta salǵanym — Ábilhan Qasteevtiń portreti. A3 formatyndaǵy sýretti qaryndashpen 2 saǵatta salyp shyqtym.
— Sýret salýdan bólek qandaı hobbılerińiz bar?
— Shahmat oınaǵandy jaqsy kóremin. Mıdy qımyldatyp, ár júristi oı eleginen ótkizesiń. Keleshekte shahmat úıirmesine de barǵym keledi. Odan keıin digital formatynda sýret salatynym bar. Ol — kompıýterde salynatyn sýret. Sol arqyly tabys ta taýyp júrmin. Komıksterge, onlaın oıyndarǵa tapsyrys arqyly sýret salamyn. Tek elimizdiń basqa qalalarynan emes, TMD elderinen de áleýmettik jeli arqyly habarlasyp, tapsyrys beretinder jıi kezdesedi.
— Ózińizdi bolashaqta kim retinde kóresiz?
— Keleshekte ózimdi sýretshi retinde ǵana elestetemin. Armanym — Qazaqstandaǵy eń tanymal sýretshi bolý. Qazaqtyń salt-dástúri men mádenıetin sýret arqyly kúlli álemge nasıhattasam deımin.
