Óskemendegi zııandy tútin týraly vıdeodan soń tekserý júrgizildi

ÓSKEMEN. KAZINFORM – Óskemen qalasyndaǵy zaýyttan zııandy zattardyń kóp mólsherde shyǵarylǵany jaıly aqparattan soń tekserý júrgizilgenimen, aýadaǵy lastaýshy zattardyń ruqsat etilgen shekten aspaǵany anyqtaldy.

Kesheli beri áleýmettik jelide qaladaǵy Tıtan-magnıı kombınatynyń mańynda túsirilgen vıdeo tarap ketti. Onda zaýyttan apatty deńgeıde zııandy zattardyń shyǵarylyp, aýany lastap jatqany aıtylǵan. 

— Bizdiń mamandar birden sol jerge baryp, atmosferalyq aýanyń sapasyna aspaptyq ólsheýler júrgizdi. Nátıjesinde, lastaýshy zattardyń shekti ruqsat etilgen kontsentratsııasynan asý deregi tirkelgen joq. — dep habarlady ShQO Ekologııa departamentinen. 

Vedomstvo dereginshe, ólsheý jumystarynyń nátıjelerine aýa raıy jaǵdaılary, naqty aıtqanda, shyǵaryndylardyń taralýyna yqpal etken jeldiń jyldamdyǵy men baǵyty áser etýi múmkin. 

— Zaýyt tarapynan da zııandy shyǵaryndylardyń apatty deńgeıde taralýyna qatysty qandaı da bir aqparat kelip túspedi. Biz jaǵdaıdy baqylaýdy jalǵastyramyz jáne qajet bolsa qoldanystaǵy zańnama aıasynda qosymsha sharalar qabyldaımyz, — delingen aqparatta.

Eske salsaq, buǵan deıin Óskemen turǵyndary aýada hımııalyq ıis seziletinin aıtyp shaǵymdanǵany jaıly jazǵanbyz.