Óskemende jol apaty eki jarym ese artty

ÓSKEMEN. KAZINFORM – Óskemen qalasynda jyl basynan beri jol apatynan 414 adam zardap shekti.

Osy jyldyń 5 aıynda qala boıynsha 300-den astam jol-kólik oqıǵasy tirkeldi. Bul kórsetkish ótken jylmen salystyrǵanda 2,5 esege artyp otyr.

Jol apatynan 414 adam túrli dene jaraqatyn alǵan. Bul týraly Óńirlik kommýnıkatsııalar qyzmetinde ótken baspasóz konferentsııasy barysynda Óskemen qalasy Polıtsııa basqarmasynyń bastyǵy orynbasarynyń mindetin atqarýshy, polıtsııa maıory Erkin Sattybaev málim etti.

- Jol-kólik oqıǵalarynyń aldyn alý úshin polıtsııa qyzmetkerleri jol belgileri men jaryqtandyrý júıesiniń jaǵdaıyn tekserip, jol erejelerin óreskel buzǵan azamattardy ákimshilik jaýapkershilikke tartyp jatyr. Shahar boıynsha júrgizýshilerge jol qozǵalysy erejelerine qatysty jadynamalar taratylyp, áleýmettik jelilerde oqytý maqsatyndaǵy beınerolıkter de jarııalandy, - dedi ol.

Sonymen qatar mektepterde, bazarlarda jáne saýda ortalyqtarynda joldaǵy qaýipsizdik týraly túsindirý jumystary qolǵa alynǵan.

Eske salsaq, osyǵan deıin elordada kólik basqaryp kele jatqan júrgizýshi kenetten qaıtys bolǵany habarlanǵan.