Óskemende jasyryn esirtki zerthanasyn uıymdastyrýshy ustaldy
ShQO Polıtsııa departamenti baspasóz qyzmetiniń málimetine súıensek, tártip saqshylary esirtki zattarynyń zańsyz aınalymyna qatysy bar Óskemen turǵynyn anyqtady. Belgili bolǵandaı, ol esirtki zerthanasyn uıymdastyryp, paıda tapqan.
«Zerthanaǵa aınalǵan úıge sanktsııalanǵan tintý júrgizý barysynda jedel ýákilder er adamnyń marıhýana ósirýmen aınalysqanyna kóz jetkizdi. Ydystaǵy esirtki ósimdikteri belgili bir temperatýra men ylǵaldylyq saqtalatyn eki qosalqy bólmede ósirilgen», - dedi ShQO PD bastyǵynyń orynbasary Talǵat Shaıahmetov.
Tintý kezinde 154 túp marıhýana anyqtaldy. Esirtkiniń jalpy salmaǵy 19 kelini quraıdy. Sot sanktsııasymen qamaýǵa alynǵan 40 jastaǵy kúdiktige qatysty QR QK-niń 300-baby 2-bóligine (quramynda esirtki zattary bar, ósirýge tyıym salynǵan ósimdikterdi zańsyz ósirý) sáıkes tergeý amaldary júrgizilýde.
