Óskemende sıntetıkalyq esirtkini taratýmen aınalysqan 11 adam ustaldy
Oblystyq Polıtsııa departamenti baspasóz qyzmetiniń málimetine súıensek, polıtseıler men prokýratýra qyzmetketkerleri birlesip, esirtki saýdasynyń jolyn kesýge baǵyttalǵan arnaıy is-sharalar keshenin ótkizdi.
Ǵalamtorda júrgizilgen monıtorıng nátıjesinde sıntetıkalyq zattardyń taralýyna qatysy bar saıttar anyqtaldy. Óskemendegi jaǵdaıdy taldaý jáne qadaǵalaý arqyly quqyq qorǵaý organdary sıntetıkalyq esirtkini taratýmen aınalysqan 11 adamdy ustady.
«Qajetti dálelder bazasyn jınaý jáne kúdiktilerdi ustaý úshin birneshe apta qajet boldy. Osy ýaqyt ishinde jedel ýákilder táýlik boıy demalyssyz jumys istedi. Qylmys jasaǵan adamdar kıimderin únemi aýystyryp otyrdy jáne keıbir jaǵdaılarda parık te qoldandy. Ustalǵandar týraly aqparat qylmystyq toptyń basqa múshelerine jetpeýi úshin kúdiktilerdiń árqaısysy bólek qolǵa túsirildi», - dedi oblystyq PD bastyǵynyń orynbasary Talǵat Shaıahmetov.
Ustalǵandardan sıntetıkalyq esirtkiniń 220-dan astam birrettik dozasy jáne «ekstazı» dep atalatyn 80 tabletka tárkilendi. Búginde atalǵan adamdardyń barlyǵy sot sanktsııasymen qamaýǵa alynǵan. Olarǵa qatysty QK-tiń 297-baby 3-bóligimen sotqa deıingi tergeý bastaldy.
