Óskemende saıajaıǵa «bomba qoıǵan» er adam aıyppul tóleıdi
ShQO Polıtsııa departamenti baspasóz qyzmetiniń málimetine súıensek, 1 tamyz kúni belgisiz er adam «112» jedel arnasyna qońyraý shalyp, Óskemendegi «Energetık-2» baý-baqsha qaýymdastyǵyndaǵy saıajaılardyń birine jarylǵysh zat qoıylǵany týraly habarlaǵan.
«Habar túse salysymen oqıǵa ornyna mamandandyrylǵan qyzmetter jiberildi. Alaıda tekserý barysynda bomba jaıly aqparat jalǵan bolyp shyqty. Kóp uzamaı tártip saqshylary qońyraý shalǵan adamdy anyqtady. Ol – qalanyń 50 jastaǵy turǵyny», - delingen aqparatta.
Saraptama qorytyndysyna sáıkes er adamnyń «ortasha» dárejede mas bolǵany belgili boldy. Atalǵan fakti boıynsha oǵan qatysty QR ÁQBtK-niń 438-baby 1-bóligimen (Memlekettik órtke qarsy qyzmet, polıtsııa, jedel medıtsınalyq kómek, avarııalyq qyzmetter organdaryn kórineý jalǵan shaqyrý) ákimshilik hattama toltyryldy. Endi óskemendik 30 AEK (103 500 teńge) mólsherinde aıyppul tóleýge mindetteldi.