Óskemende Respýblıka kúnine oraı Memlekettik tý kóterý rásimi ótti
ÓSEMEN. KAZINFORM - Búgin Óskemen qalasynda Táýelsizdik monýmenti alańynda Respýblıka kúnine arnalǵan Memlekettik tý kóterý rásimi ótti.
Oǵan qala turǵyndary, ardagerler, áskerı qyzmetshiler, jastar jáne memlekettik qyzmet ókilderi, sondaı-aq oblys ákimi Nurymbet Saqtaǵanov qatysty. Qazaqstannyń Ánurany shyrqalǵan sátte kók baıraq kókke kóterilip, eldiń erkindigi men birliginiń, táýelsizdiginiń nyshanyna aınaldy.
– Barshańyzdy elimizdiń eń basty ulttyq merekesi – Respýblıka kúnimen shyn júrekten quttyqtaımyn! Azat eldiń búgingi jetistikteri men tabysy, aýqymdy reformalar men uzaqmerzimdi basymdyqtardyń barlyǵy el egemendiginiń arqasynda ǵana múmkin bolyp otyr.
Sondyqtan egemendigimizdi eselep, táýelsizdigimizdi kózimizdiń qarashyǵyndaı saqtaý – barshamyzǵa artylǵan abyroıly mindet!, – dedi aımaq basshysy óz sózinde.
Saltanatty sharanyń erekshe sáti – jas memlekettik qyzmetshilerdiń ant qabyldaý rásimi boldy. Olar búgin óz tańdaǵan mamandyǵyna adal jáne el úshin qyzmet etý ustanymdaryna berik ekenin resmı túrde rastady.
Memleket basshysy Qasym-Jomart Toqaev óz Joldaýynda atap ótkendeı, biz kúrdeli zamandaǵy buryn-sońdy bolmaǵan syn-qaterlerge qaramastan, Ádiletti Qazaqstandy – barlyq azamattar úshin teń múmkindikter elin quryp kelemiz. Saıası, ekonomıkalyq jáne áleýmettik salalardaǵy reformalar Otannyń órkendeýine jáne halyqtyń ál-aýqatyn arttyrýǵa baǵyttalǵan.
Bul sózder merekeniń negizgi uranyna aınalyp, Respýblıka kúniniń basty mánin – el bolashaǵy úshin jaýapkershilikti, eńbeksúıgishtikti jáne damýǵa degen umtylysty aıqyn kórsetti.
Saltanatty rásim taǵy bir márte memlekettiń qýaty – halyq birliginde, urpaqtar sabaqtastyǵynda jáne óz kúshine degen seniminde ekenin eske saldy.