Óskemende probatsııalyq baqylaýdan jaltarǵan 50 adam túrmege qamaldy

ÓSKEMEN. QazAqparat – Óskemen qalasynda probatsııalyq baqylaýdan jaltarǵan 50 adam temir torǵa qamaldy, dep habarlaıdy QazAqparat tilshisi.

ShQO boıynsha Qylmystyq-atqarý júıesi departamenti baspasóz qyzmetiniń málimetine súıensek, óńir aýmaǵynda «Quqyqtyq tártip» jedel-aldyn alý sharasy júrgizilýde. Sonyń aıasynda Óskemen qalalyq probatsııa qyzmetiniń mamandary turǵylyqty mekenjaıy boıynsha esepte turǵan 140-tan astam sottalǵandy tekserdi.

Inspektorlar probatsııalyq baqylaý tártibin buzǵandarǵa birinshi kezekte saǵat 22.00-den kelesi kúni tańǵy 06.00-ge deıin turǵylyqty jerinen shyqpaý týraly túsindirý jumystaryn júrgizedi. Buzýshylyq qaıtalanǵan jaǵdaıda sol adamǵa jaza túri bas bostandyǵynan aıyrýǵa aýystyrylatyndyǵy týraly qatań eskertiledi.

«35 jastaǵy Óskemen turǵyny sot sheshimin oryndaý týraly talaptardy birneshe ret elemegen. Probatsııa qyzmetine kezekti tirkeýge kelmegen onyń dostarymen qoǵamdyq orynda alkogoldi ishimdik ishkeni belgili boldy. Sondyqtan bas bostandyǵyn shekteý jazasyn bas bostandyǵynan aıyrýǵa aýystyrý úshin tıisti materıal sotqa jiberildi», - dedi Probatsııa qyzmeti basqarmasynyń basshysy Maqsat Manarbekov.

Aıta keteıik, jyl basynan beri shahar boıynsha probatsııalyq baqylaýdan jaltarǵan 50 adam túrmege qamalǵan.