Óskemende órtengen úıden 2 adam qutqaryldy
Óskemen qalasynda órtengen úıden 2 adam qutqaryldy, dep habarlaıdy Kazinform.
ShQO Tótenshe jaǵdaılar departamenti baspasóz qyzmetiniń málimetine súıensek, 24 qarashada qaladaǵy Svoboda kóshesinde 5 qabatty úıdegi páterlerdiń birinde órt shyqty.
«Shaqyrtý túse salysymen órt sóndirýshiler oqıǵa ornyna jolǵa shyqty. Kelgen kezde 1 qabattyń terezesinen shyǵyp jatqan qoıý tútindi kórdi. Tútin arasynan tereze janynda turǵan adam baıqalǵan. Olar tereze arqyly ishke kirip 2 adamdy qutqaryp qaldy. Atap aıtqanda, 56 jastaǵy úı ıesi men onyń 87 jastaǵy ákesi», - delingen aqparatta.
Kók tútin úıdiń podezinen basqa qabattarǵa taralǵan. TJD qyzmetkerleri basqa páterlerdegi 6 turǵyn men úsh balany syrtqa alyp shyqty. 4-shi qabattaǵy páterden avtosaty arqyly taǵy 6 bala qutqaryldy.
Kóp uzamaı jalpy aýdany alty sharshy metrdi quraǵan tilsiz jaý tolyǵymen aýyzdyqtaldy.
Zardap shekken eshkim joq. Jalynmen kúreske jeke quramnan 21 adam men 7 tehnıka jumyldyrylǵan.
