Óskemende mektepten jarylǵysh zat tabylǵan joq
ShQO Polıtsııa departamenti baspasóz qyzmetiniń málimetine súıensek, 9 aqpanda saǵat 16:10-da qaladaǵy mektepterdiń birinde jarylǵysh zat qoıylǵany týraly habar tústi. Mamandandyrylǵan qyzmetter dereý oqıǵa ornyna keldi. Mektep ujymy men oqýshylar evakýatsııalanǵan soń tekserý jumystary júrgizildi.
«Sonyń nátıjeleri boıynsha ǵımarattan qandaı da bir qaýipti zattar tabylǵan joq. Atalǵan fakti boıynsha QR QK-niń 273-babymen sotqa deıingi tergeý bastaldy. Qazirgi ýaqytta bomba týraly jalǵan habarlaǵan adamdardy anyqtaý boıynsha is-sharalar júrgizilýde. Mundaı qylmys jasaǵan adamnyń 5 jylǵa deıingi merzimge bas bostandyǵynan aıyrylýy múmkin ekendigin eskertemiz», - delingen aqparatta.
Eske salsaq, osyǵan deıin Óskemende taǵy da mektepke bomba qoıylǵany týraly habar túsip, oqýshylar men muǵalimder evakýatsııalanǵanyn habarlaǵan edik.
