Óskemende kitap oqý jarysynda 14 jastaǵy bala kósh basynda kele jatyr

ASTANA. QazAqparat - Jaz bastalǵaly Óskemen qalasyndaǵy oblystyq Pýshkın kitaphanasy «Oqý kóshbasshysy. Jaz - 2017» jarysyn bastaǵan bolatyn. Búginge deıin bilimniń biregeı saıysyna 1 350 oqyrman atsalysqan, dep habarlaıdy «QazAqparat» HAA tilshisi.

«Bilim álemindegi bilim izdegen ult» uranymen uıymdastyrylǵan baıqaýǵa 6-17 jas aralyǵyndaǵy balalarǵa qatysýǵa bolady. Ár kitapty oqyǵanmen birge, ony jetkilikti dárejede sanaǵa sińirý de - baıqaýdyń basty sharttarynyń biri. «Oqý kóshbasshysy. Jaz - 2017» jarysynyń basty úılestirýshisi Oljas Kármenovtyń aıtýynsha, jarys bastalǵaly kitaphananyń balalar sektoryna kelýshilerdiń sany kúrt kóbeıip ketken.

«Buǵan deıin balalar kitaphanaǵa dál bulaı jınalyp kelmeıtin. Búgingi kúni 1 350 oqyrman belssendilerdiń qatarynda. Ásirese, 8 ben 10 jas aralyǵyndaǵy 230 bala kún saıyn turaqty túrde kelip júr. Biraq, 10-14 jas aralyǵyndaǵy býynda Nıkıta Pýstovarov esimdi balanyń kitapqa qushtarlyǵy erekshe. Jaz basynan beri 86 kitapty oqyp qoıdy. Mazmunyn da tamsandyra aıtyp beredi», - deıdi Oljas Kármenov.

Balalar kóbinese ertegiler men áńgimelerge, kerek deseńiz romandarǵa da den qoıady eken. Fantastıkalyq jáne tarıhı týyndyǵa suranys joǵary. Qazirgi tańda robototehnıkaǵa kóp qyzyǵatyndyqtan, atalǵan taqyryptaǵy oqýlyqtar kitap sórelerinde shań basyp jatpaıtyn kórinedi.

«Oqý kóshbasshysy. Jaz - 2017» baıqaýynyń qorytyndysy 2017 jyldyń 27 qyrkúıeginde shyǵady. Jarystyń jeńimpazdaryna baǵaly syılyqtar tabystalmaq.