Óskemende keler jyly 5 «SOS dabyl» batyrmasy ornatylady

ÓSKEMEN. QazAqparat – Óskemen qalasynda 2023 jyly 5 «SOS dabyl» batyrmasy ornatylmaq, dep habarlaıdy QazAqparat tilshisi.

ShQO polıtsııa departamenti baspasóz qyzmetiniń málimetine súıensek, búgingi tańda Óskemende bes «SOS dabyl» batyrmasy bar. Olar Zaşıta shaǵyn aýdanynda, Metallýrgtar mádenıet úıi mańaıynda, Vınogradov jáne Grýzınskaıa kósheleriniń qıylysynda, «Zarechnyı» bazary men Qabanbaı batyr kóshesinde «Koton» saýda úıiniń janynda tur.

«Jyl basynan beri osy batyrmalar arqyly 10 azamat polıtsııaǵa habarlasty. Onyń ishindegi 6-y beıneqońyraý, 4-i aýdıo format arqyly. Barlyq aryz-shaǵym boıynsha tıisti shara qabyldandy», - delingen aqparatta.

Vedomstvo dereginshe, 2023 jyly qala boıynsha taǵy bes «SOS dabyl» batyrmasyn ornatý kózdelip otyr.