Óskemende qaı jerlerde sýǵa túsýge bolady
ÓSKEMEN. KAZINFORM – Óskemen qalasynda sýǵa túsýge bolatyn 2 jer bar. Taǵy bir jaǵalaý abattandyrylyp jatyr. Kazinform tilshisi sol jerlerge baryp, búgingi ahýaldy baqylap qaıtty.
Jaǵajaıǵa jurt aǵylyp jatyr
Jaıdary jaz shyǵa salysymen eldiń kóbi jaǵalaýǵa asyǵady. Sýǵa túsip, kúnge qyzdyryný — janǵa da, tánge de paıdaly. Ásirese shilińgir shildede shomylǵysy keletinder qatary qalyńdaıdy.
Qala ákimdiginiń qaýlysymen Óskemende sýǵa túsýge bolatyn 2 ýchaske bekitilgen. Sonyń biri — «Samal» saıabaǵynda.
Bul saıabaq 2019 jyldyń tamyz aıynda ashylǵan. Onda strıt-vorkaýt alańy, skeıt-park, fýtbol, voleıbol jáne basketbol alańdary, uzyndyǵy shamamen 1,3 shaqyrymd velojol bar.
Qumdy jaǵajaı da menmundalaıdy. Halyq saıabaqqa jazda shomylý úshin atbasyn bursa, basqa mezgilde serýendeýge, sportpen shuǵyldanýǵa keledi.
— «Samal» saıabaǵyna jıi kelemiz. Sebebi úıimiz jaqyn ornalasqan. Keshki ýaqytta bala-shaǵańmen serýendep júrgenge taptyrmas jer. Biraq sýǵa túspeımiz. Sebebi aǵyndy. «Saqtansań saqtaıdy» degendeı, balalar úshin alańdaımyz. Shomylǵymyz kelse Óskemennen shyǵyp Ulan aýdanyndaǵy Sibe kóline nemese Altaıdaǵy Buqtyrmaǵa barǵandy jaqsy kóremiz, — deıdi Tilek esimdi turǵyn.
Sýǵa túsetin ekinshi jer — Etnosaıabaqtaǵy jaǵalaý. Ol 2013 jyldyń 15 shildesinde ashylǵan. Jaǵajaıdyń jalpy aýdany shamamen 200 sharshy metrdi quraıdy.
— Munda barlyǵy 10 adam jumys isteıdi. Onyń ishinde 6 qutqarýshy, 2 kassır jáne tazalyqqa jaýap beretin 2 adam bar. Jaǵajaıǵa kirý baǵasy — eresekterge 400 teńge, zeınetkerler men stýdentterge 200 teńge. Balalarǵa tegin. Budan bólek, demalýshylar saıabaq aýmaǵyndaǵy qaıyq stantsııasyna bara alady. Onda serýendeýge arnalǵan alleıalar da jasalǵan, — deıdi Shyǵys Qazaqstan oblystyq mýzeı qoryǵy dırektorynyń orynbasary Gúljan Kashakýqyzy.
Jaǵalaý dál qazir jabyq tur. Sebebi sanıtarlyq epıdemıologııalyq baqylaý departamentiniń mamandary sý áli tazalaný kerek degen uıǵarymǵa kelgen.
Tazalyq jumystary aıaqtalǵan soń taǵy da synama alynady. Eger sol kezde bekitilgen talapqa saı kelse onda jaǵajaı demalýshylardy qaıta qabyldaı bastaıdy.
Budan bólek, Óskemende taǵy bir jaǵalaý abattandyrylyp jatyr. Ol Kendi emes materıaldar kombınaty aýdanynda oryn tepken, halyq arasynda «Kotlovan» ataýymen tanymal jaǵajaı.
Qazirgi ýaqytta onda avtoturaqqa asfalt tóselip, aýmaǵy tormen qorshalǵan. Oryndyqtar, kóleńkeli shatyrlar men eki dárethana ornatylyp, qum tógilipti.
— Sý aıdyny men onyń mańyn tolyq baqylaýǵa múmkindik beretin qutqarý beketiniń munarasy turǵyzylyp, qajetti qural-jabdyqpen jabdyqtaldy. Qatty jabyndysy bar jaıaý júrginshiler jolaǵy tóselip, bordıýrler qoıyldy. Endi ShQO Tabıǵı resýrstar jáne tabıǵat paıdalanýdy retteý basqarmasy atalǵan jaǵalaýǵa resmı túrde shomylýǵa ruqsat etilgen jaǵajaı mártebesin alý úshin qujattardy rásimdeý ústinde, — dep jaýap berdi Óskemen qalalyq TÚKSh bóliminen Kazinform tilshisiniń saýalyna.
Qaýipsizdikti qaperden shyǵarmańyz!
Alaıda el arasynda bul jaǵalaýlardan basqa jerlerde shomylatyndar qarasy az emes. Olar arnaıy abattandyrylmaǵandyqtan qaýipti sanalady. Sol ýchaskelerdi atap ótsek:
— «Kolos», «Oral» saıajaı qoǵamdastyqtarynyń mańy;
— D. Serikbaev atyndaǵy Shyǵys Qazaqstan memlekettik tehnıkalyq ýnıversıteti janynda ornalasqan araldaǵy toǵan;
— Sol jaǵalaý shaǵyn aýdanyndaǵy Ertis ózeniniń jaǵasy;
— Samar tasjolynyń boıyndaǵy toǵan;
— Leshoz kentiniń janyndaǵy toǵan;
— Óskemen sý elektr stansasy aýdanyndaǵy Ertis ózeni;
— Babkına Melnıtsa kentindegi toǵan.
Osy rette óńir qutqarýshylary sý aıdyndaryndaǵy qaýipsizdikti qamtamyz etý úshin turaqty túrde reıd júrgizip jatyr.
Shahar boıynsha resmı túrde maýsym aıynyń 15-inde shomylý maýsymy ashylady. Dese de jazdyń alǵashqy kúnderinen-aq jaǵalaýǵa qustaı ushatyndar jeterlik.
— Jaz aıynyń basynan 480-ge jýyq ret reıd júrdi. Sonyń aıasynda demalýshylarǵa jaǵajaıda demalýdyń negizgi erejeleri túsindiriledi. Bizdiń basty mindet — sýdaǵy jazataıym oqıǵalardyń aldyn alý. Patrýldeý barysynda TJD qyzmetkerleri 9 adamdy, onyń ishinde 4 balany qutqaryp qaldy, — deıdi oblystyq tótenshe jaǵdaılar departamentiniń baspasóz hatshysy Marına Lıskova.
Búgingi tańda oblysta QR ÁQBtK-niń 412-baby boıynsha (sý aıdyndaryndaǵy qaýipsizdik sharalaryn buzý) 11 adam ákimshilik jaýapkershilikke tartylǵan.
Olarǵa 27 524 teńge mólsherinde aıyppul salyndy.
— Shomylý maýsymy bastalǵaly beri 3 adam sýǵa batyp ketti. Onyń ekeýi — jasóspirim. Sondyqtan demalýshylarǵa sýdaǵy qaýipsizdik erejelerin saqtaý qajettigin eskertemiz. Eń áýeli sýǵa túsý úshin tek jabdyqtalǵan jaǵajaıǵa baryńyz. Sý aıdyndarynda alkogoldi ishimdik ishpeńiz. Sondaı-aq sýdaǵy qaýipsizdiktiń mańyzdy sharty — qaıyqpen, katamaranmen, skýtermen júzý erejelerin qatań saqtaý. Olarǵa otyrǵanda mindetti túrde qutqarý keýdeshesin kıińiz. Qaıyqtan sýǵa sekirip súńgýge tyıym salynady. Qasynda eresekter bolmasa 16 jasqa deıingi balalarǵa júzý quraldaryna otyrýǵa bolmaıdy, — dep eskertti qutqarýshylar.
Jaǵalaýda qandaı da bir oqys jaǵdaıǵa tap bolsańyzdar birden «112» jedel arnasyna habarlasý qajet. Sý — qatelikti keshirmeıdi. Sondyqtan saýysqandaı saq bolý kerek!
Eske salsaq, osyǵan deıin Atyraý oblysynda shomylý maýsymy qashan ashylatyny belgisiz ekenin jazǵanbyz.
Al Jetisýda shomylý maýsymynda qaıǵyly oqıǵalar sany azaıǵany habarlanǵan.