Óskemende qalyń qar men boran saldarynan jol apaty kúrt artty
ÓSKEMEN. KAZINFORM – Óskemen qalasynda aýa raıy qolaısyzdyǵyna baılanysty jol apattarynyń sany 2,5 esege artyp otyr.
Keshe óńir boıynsha qalyń qar túsip, boran soqty. Sonyń saldarynan Óskemende jol-kólik oqıǵalary kóbeıip, kólikterdiń jyraǵa qulap ketý faktileri tirkeldi.
Polıtseıler kósheler men joldarda qarǵa batyp qalǵan júrgizýshilerge kómek kórsetti.
- Keshe qala boıynsha 25 jol apaty boldy. Osyndaı kúnderde apat sany kúrt ósedi. Ádette boran soqpaǵanda táýligine shamamen 10 shaqty kólik soqtyǵysyp jatady, - dep habarlady Óskemen qalalyq polıtsııa basqarmasynan.
Osy rette, tártip saqshylary júrgizýshilerge jyldamdyqty ruqsat etilgen shekten asyrmaı, araqashyqtyqty saqtaý qajettigin eskertti. Sondaı-aq 1 jeltoqsannan bastap qysqy dóńgelekke aýyspaǵan avtokólik ıeleri ákimshilik jaýapkershilikke tartylady.
Eske salsaq, osyǵan deıin Shyǵys Qazaqstan kósheleri men joldary tolassyz jaýǵan qardan tazalanyp jatqany habarlanǵan.