Óskemende ekologııa salasyna bólinetin qarajat kólemi ósedi

ÓSKEMEN. KAZINFORM – Óskemen qalasynda ekologııalyq jaǵdaıdy jaqsartýǵa qosymsha qarjy bólinbek.

20 qarashadan beri Óskemende qolaısyz meteorologııalyq jaǵdaı qalyptasqan. Sonyń saldarynan aýa sapasy nasharlap ketti.

Shyǵys Qazaqstan oblysynyń ákimi Ermek Kósherbaev máseleniń sebep-saldary men ony sheshý úshin qandaı sharalar atqarylatyn túsindirdi.

«Aýa sapasy qazandyqtardyń, ónerkásiptik kásiporyndardyń, avtokólikterdiń jáne kómir jaǵyp otyrǵan 28 myńnan astam jer úıdiń áserinen kúrt nasharlap otyr. Ekologııa departamenti men birqatar kásiporyn atmosferaǵa shyǵarylatyn zııandy qaldyqtardy azaıtý jáne zamanaýı súzgilerdi ornatý boıynsha memorandýmǵa qol qoıdy. Kóptegen kásiporyn bul talaptardy qatań saqtaǵanymen, aralarynda elemeıtinderi de bar. Tipti qolaısyz meteorologııalyq jaǵdaı qalyptasqan kúnderi tekserýshilerdi óz aýmaqtaryna kirgizbeı qoıady. Bul olardyń birdeńeni jasyratynyn bildiredi, — dedi oblys ákimi.

Qaladaǵy ekologııalyq jaǵdaıǵa júrgiziletin monıtorıngtiń ashyqtyǵyn qamtamasyz etý úshin aýa sapasyn baqylaıtyn qoǵamdyq keńes qurylady. Ázirge arnaıy komıssııa óz jumysyn bastady.

Sondaı-aq ekologııalyq jaǵdaıdy baqylaıtyn qosymsha datchıkterdi ornatý josparlanyp otyr.

«Datchıkter qalanyń ár aýdanynan derekterdi naqty ýaqyt rejıminde jazyp, bir júıege biriktirip, arnaıy portalda jarııalaýǵa múmkindik beredi. Halyq ózi dem alatyn aýada ne bar ekenin bilýi kerek. Bul sharalar naqty derekterdi turǵyndarǵa jetkizip qana qoımaı, el arasynda dúrbeleń týýdyń aldyn alady», — dedi aımaq basshysy.

Ekologııalyq jaǵdaıdy jaqsartý sharalaryn qarjylandyrý kelesi jyldyń bıýdjetine engiziledi. Osylaısha bılik aýanyń lastanýy máselesin keshendi túrde sheship, azamattardyń ómir súrýine jaıly jaǵdaı jasamaq.

Eske salsaq, Óskemendegi qolaısyz meteorologııalyq jaǵdaı qarasha aıynyń sońyna deıin sozylady.