Óskemende balabaqsha esepshisi 16 mln teńge jymqyrǵan
ÓSKEMEN. KAZINFORM – Óskemen qalasynda 16 mln teńge jymqyrǵan balabaqsha esepshisine qatysty sot úkimi shyqty.
Qalalyq №2 soty baspasóz qyzmetiniń málimetine súıensek, memlekettik «Jemchýjınka» balabaqshasynda esepshi bolyp jumys istegen aıyptalýshy birneshe jyl boıy aqsha jymqyryp kelgen.
«2020 jyldyń qarashasy men 2023 jyldyń qazan aılary aralyǵynda áıel adam qyzmet babyn paıdalanyp, jumys berýshiniń 15 988 396 teńgesin qaltaǵa basqan. Sot barysynda ol óz kinásin moıyndamaı, keltirilgen materıaldyq zalaldy óteýden bas tartty. Sot sheshimimen sottalýshy kináli dep tanylyp, bes jyl merzimge bas bostandyǵynan aıyryldy», - delingen aqparatta.
Áıel adamnyń kámelettik jasqa tolmaǵan balasynyń bolýyna baılanysty jazany óteý merzimi 3 jylǵa shegerildi. Úkim áli zańdy kúshine engen joq.
Eske salsaq, osyǵan deıin Óskemende ózin oblys ákiminiń orynbasary retinde tanystyryp, kásipkerden 50 mln teńge alǵan alaıaq sottalǵany habarlanǵan.
