Óskemende aıyppulyn tólemegen 30 júrgizýshi jaıaý qaldy

ÓSKEMEN. QazAqparat – Óskemen qalasynda aıyppulyn tólemegen 30 júrgizýshiniń kóligi arnaıy turaqqa qoıyldy, dep habarlaıdy QazAqparat tilshisi.

Qalalyq polıtsııa basqarmasy baspasóz qyzmetiniń málimetine súıensek, tártip saqshylary «Boryshker» jedel aldyn alý sharasyn júrgizdi. Sonyń barysynda úsh kún ishinde jol erejesin 15 ret buzǵan «VAZ» kóliginiń júrgizýshisi toqtatyldy.

Er adam jol belgileri talaptaryn oryndamaý, manevr jasaý erejelerin buzý, jyldamdyqty ruqsat etilgen shekten asyrý syndy buzýshylyqtar jasaǵan. Salynǵan aıyppuldyń jalpy somasy – 266 myń teńgeni qurady. Polıtseılerdiń anyqtaýynsha, júrgizýshi qalaǵa alǵash ret kelgen.

«Shara barysynda aıyppulyn tólemegen 30 júrgizýshiniń avtokóligi mamandandyrylǵan turaqqa qoıyldy. 2000-nan astam azamatqa ákimshilik aıyppulyn tóleý qajettigi týraly habarlama taratyldy», - deıdi basqarma bastyǵy Andreı Mýla.

Esterińizge sala ketsek, osyǵan deıin Óskemen qalasy turǵynynyń ózin rıeltor retinde tanystyrǵan alaıaqqa aldanyp qalǵanyn habarlaǵan edik.