Óskemende aýaǵa taraǵan eki zııandy zattyń mólsheri shekti deńgeıden asyp ketken

ÓSKEMEN. KAZINFORM – Óskemen qalasynda aýaǵa taraǵan eki zııandy zat mólsheri ruqsat etilgen shekten asyp ketkeni anyqtaldy.

«Qazgıdromet» RMK Shyǵys Qazaqstan oblystyq fılıalynyń málimetine súıensek, 29 qańtarda Óskemen qalasynda atmosferalyq aýa sapasyna monıtorıng júrgizildi. Sonyń nátıjesinde, eki zııandy zattyń mólsheri shekti deńgeıden asyp ketkeni anyqtalyp otyr.

- Naqty aıtqanda, kómirtegi totyǵynyń mólsheri shekti normadan 2,023 ese, al kúkirtsýtek boıynsha 1,625 ese asqan. Bul kúni qalada qolaısyz meteorologııalyq jaǵdaı qalyptasqan. Osyndaı kezde ádette jel soqpaı, aýanyń lastaný deńgeıi joǵary bolady dep kútiledi, - delingen aqparatta.

Aıta keteıik, jelsiz kúnder qalada erteń de jalǵasady. Ekinshi dárejeli qolaısyz meteorologııalyq jaǵdaılar 30 qańtar saǵat 20.00-ge deıin sozylmaq.

Eske salsaq, osyǵan deıin elimizdiń 11 qalasynda aýa sapasy nasharlaıtyndyǵy habarlanǵan.