Óskemende aýa sapasyn baqylaıtyn 25 beket ornatylmaq
ÓSKEMEN. KAZINFORM – Óskemen qalasynda bıyl aýa sapasyn baqylaıtyn 25 beket ornatylady.
Qalany tútin tumshalap turǵanyna búgin 11 kún boldy. Soǵan oraı oblys ákimdigine ekologııa máselesi talqyǵa salynǵan jınalys ótti.
- Aýa sapasyn baqylaıtyn beketterdi ornatý jumystaryn 2027 jylǵa deıin soza almaımyz. Áıtpese halyq bizdi túsinbeıdi. Sondaı-aq ekologtardyń kásiporyndardyń aýmaǵyna kire alý máselesin sheshý qajet. Kásiporyndar jumysyna qatysty aryz-shaǵymdar únemi túsip otyrady, bul durys emes, - dedi aımaq basshysy.
Qala boıynsha aýa sapasyn baqylaıtyn beketter ornatylatyn jerlerdiń kartasy jasalyp qoıǵan.
- Ekologııalyq bıýro otyrysynda biz taldaý júrgizip, jańa datchıkterdi qaıda ornatý kerektigin qarastyrdyq. Monıtorıngtiń biryńǵaı júıesi lastaýshy zattardyń shekti ruqsat etilgen kontsentratsııadan asyp ketý faktisin jedel anyqtaýǵa múmkindik beredi, - dedi «Óskemen tynysy» ekologııalyq bıýrosy jobalyq keńsesiniń jetekshisi Elena Berezınskaıa-Abılova.
Aıta keteıik, oblys bıligi qoǵamdyq kólikterdi gaz nemese elektr qýatyna kóshirý jaǵyn da oılastyrýda.
Eske salsaq, buǵan deıin Óskemendi tútin tumshalap turǵanyna 10 kún bolǵany habarlanǵan.