Óskemende apat bolǵan sý qubyrlary qalpyna keltirildi

ÓSKEMEN. KAZINFORM — Óskemen qalasynda apat bolǵan sý qubyrlary qalpyna keltirilip, úılerge sý berildi. 

Tórt kúnge sozylǵan qatty aıaz áserinen qaladaǵy Karbyshev, Bespalov, Geologıcheskaıa kóshelerinde sý qubyry jelilerinde apat bolǵan.

Qubyrdy qalpyna keltirý jumystaryna baılanysty sýyq sý berý ýaqytsha toqtatylyp, turǵyndarǵa sý tasymaldaý uıymdastyryldy.

ShQO ákimdiginiń málimetinshe, Bespalov kóshesindegi qubyr 1964 jyly salynǵan. Qazirgi tańda tozyǵy jetip otyr. 

— Osyndaı jaǵdaılardy boldyrmaý úshin eski qubyrlar ret-retimen aýystyrylyp jatyr. Qazirgi ýaqytta jaǵdaı qalypqa keltirildi. Qalanyń kommýnaldyq ınfraqurylymy shtattyq rejımde jumys istep tur. Jaǵdaı baqylaýda, — delingen aqparatta.

Eske salsaq, osyǵan deıin Óskemende sý qubyrynda apat bolyp, birneshe kóshe sýsyz qalǵany habarlanǵan.