Óskemende «ádemi kúnde» neke qıǵandar kúrt kóbeıdi

ÓSKEMEN. KAZINFORM – Óskemen qalasynda keshegi kúndi, ıaǵnı 2025 jyldyń 25 aqpanyn ádeıi tańdap (25.02.2025), neke qıǵandar kóp boldy.

Talaı jup zańdy nekege otyrarda «ádemi kúnderdi» tańdap jatady. Sondaı kúnderdiń biri keshe boldy. 25 aqpanda tańerteńnen bastap Shyǵys Qazaqstan oblysynyń AHAT bólimderine jas jubaılar kóptep kelip, nekelerin tirkeý týraly qujat alý úshin ótinish bildirdi.

- Mundaı «sáıkes sandar» kúnderi árqashan jas jubaılar arasynda tanymal. Óskemende bir kúnde 48 jup nekege otyrdy. Al aýdandarda 7 jup tirkeldi. Erli-zaıyptylarǵa baqytty otbasylyq ómir, shýaqty da shattyqty kúnder tileımiz, - deıdi «Azamattarǵa arnalǵan úkimet» memlekettik korporatsııasynyń Shyǵys Qazaqstan oblysy boıynsha AHAT bóliminiń basshysy Álııa Kýshkınbaeva.

Aıta keteıik, ádettegi kúnderde óńirdegi AHAT bólimderinde, ádette 5-ten 10-ǵa deıin neke tirkeledi. Sońǵy jyldary Shyǵys Qazaqstan oblysynda jańa resmı tirkelgen otbasylar sany turaqty túrde artyp keledi. 2022 jyly 4578 jup neke qısa, 2023 jyly 4682-ge, 2024 jyly 4884-ke jetti.

AHAT mamandary qazirgi ýaqytta otbasyn qurǵandardyń orta jasy ózgergenin baıqap otyr. Máselen, eger 4-5 jyl buryn jańa túsken juptardyń ortasha jasy 22-23 jas bolsa, búgingi tańda ol 26-28 jasty quraıdy.

Eske salsaq, buǵan deıin Qytaıda neke qııý kórsetkishi taǵy da quldyraǵany jaıly habarlaǵan edik.