Óskemende adamdardy órt pen sýdan qutqarǵandar marapattaldy

ÓSKEMEN. QazAqparat – Óskemen qalasynda sýǵa batyp bara jatqan 3 adamdy qutqaryp qalǵan eki jigit pen órtengen úıden kórshisin alyp shyqqan zeınetker marapattaldy, dep habarlaıdy QazAqparat tilshisi.

QR Tótenshe jaǵdaılar mınıstriniń buıryǵymen Óskemende adam janyn ajaldan arashalap qalǵan beıbit kúnniń batyrlary marapattaldy.

«SUNRISE» rezıdentsııasynyń qyzmetkeri Edýard Lıskaýskas jáne «Jolbarys-Kúzet» agenttiginiń kúzetshisi Talǵat Darýbaev 6 mamyrda Ablaketka aılaǵynda rezeńke qaıyqpen aýdarylyp sýǵa batyp bara jatqan 3 adamǵa kómekke umtylǵan. Ekeýi qutqarýshylarmen birge olardy sýdan alyp shyqty. Osylaısha, jigitterdiń eren erliginiń arqasynda úsh birdeı jannyń ómiri qutqaryldy. Edýard pen Talǵatqa mınıstrdiń Alǵys haty berildi», - dep habarlady ShQO TJD baspasóz qyzmeti.

Sonymen qatar mekteptegi Alǵashqy áskerı daıyndyq pániniń oqytýshysy, QR ІІM zeınetkeri Nurbek Tokýshev otqa oranǵan úıden mas kúıdegi 1950 jyly týǵan kórshisin alyp shyqqan. Egde jastaǵy er adamnyń erligi de eleýsiz qalmady.

«Jerlesterimiz osyndaı syn saǵatta jyldam áreket ete alatyndyqtaryn, qıyndyqqa tap bolǵandarǵa qolushyn sozýǵa árkez ázir ekendikterin kórsetti. Olar jaǵdaıdy durys baǵalap, adam ómirine arasha tústi. Bul maqtaýǵa turarlyq áreket», - dedi departament bastyǵy Erlan Nurpeıisov.