Óskemende 600 oryndyq jańa mektep ashyldy
ÓSKEMEN. KAZINFORM – Búgin, 1 qyrkúıek – Bilim kúni Óskemendegi Nurly jol shaǵyn aýdanynda irge kótergen jańa mektepte alǵashqy qońyraý soǵyldy. Qazaq tilinde bilim beretin oqý ordasynyń lentasyn Shyǵys Qazaqstan oblysy ákiminiń orynbasary Erbol Nurǵalıev pen Qazaqstan Jazýshylar odaǵy oblystyq fılıalynyń dırektory, jazýshy Álibek Qańtarbaev qıdy.
Jańa mektep 600 balaǵa arnalǵan. Eki aýysymmen jumys isteıtin bolǵandyqtan jıyny 1200 balany qamtýǵa áleýetti.
Zamanaýı úlgide salynyp, materıaldyq-tehnıkalyq bazasy talapqa saı jabdyqtalǵan №50-shi bilim mekemesinde jas urpaqtyń sapaly bilim alýyna barlyq jaǵdaı jasalǵan. Munda ınklıýzııa kabıneti, ashana, sport zaly, dáriger kabıneti, úsh sheberhana, radıoortalyq, sensorlyq bólme, ata-analardy qoldaý ortalyǵy, muraǵat, kitaphana, robotty tehnıka kabıneti jáne zerthanasy, akt zaly, psıhologııalyq qyzmet jáne logoped kabıneti bar.
– Búgin óskemendikter úshin tarıhı sát! Oblys ortalyǵy qarqyndy ósip, jańa yqshamaýdandar salynyp, olardyń áleýmettik ınfraqurylymy búgingi zaman talabyna saı jasalyp jatyr. Sonyń bir kórinisi – jańadan ashylyp turǵan osy mektep. Bul bilim ordasy elimizde Prezıdenttiń tapsyrmasymen boı kóterip jatqan «Jaıly mektepterden» esh kem emes. Barlyq jaǵdaı jasalǵan. Ahmet Baıtursynov: «Eldi túzeý, bala oqytý isinen bastalýy kerek» dep aıtqan. Sondyqtan bilim salasyna memleket tarapynan erekshe kóńil bólinýde. Bıyldyń ózinde oblysta budan bólek taǵy eki mektep jyl sońyna deıin Zaısan aýdany men Jańa Buqtyrma kentinde ashylady. Sonymen qatar óńirde jeti «Jaıly mekteptiń» qurylysy bastaldy. Munyń bári halyqtyń, ósip kele jatqan urpaqtyń ıgiligi úshin istelip jatyr, - dep atap ótti oblys ákiminiń orynbasary Erbol Nurǵalıev.
Mektep basshylyǵynyń aıtýynsha, jańa bilim ordasynda barlyǵy 24 synyp oqıdy. Onyń segizi bastaýysh bolsa, 10-y orta býyn, tórteýi joǵary býyn synyptary. Budan bólek eki mektepaldy daıarlyq synyby bar. Nurly jol shaǵyn aýdanynda jańa bilim berý uıymynyń ashylýy balalardy turǵylyqty jeri boıynsha qabyldaýmen qatar pedagogtarǵa jańa jumys oryndaryn ashýǵa múmkindik týǵyzyp otyr.
– Ózim osy aýdanda turamyn. Bul kúndi kópten kúttik. Qurylys barysyn kúnde kórip júrdik. Úlken jumys atqaryldy, qanshama eńbek, qanshama ter tógildi. Oblystyń, qalanyń basshylyǵy kóp kúsh saldy. Bul mektep Óskemendegi eń zamanaýı, mańdaıaldy bilim ordalarynyń biri bolady dep oılaımyn. Búgin ulym jańa mekteptiń tabaldyryǵyn attap, birinshi synypqa baryp jatyr. Búldirshinderimizdiń qadamy qutty, joly ashyq bolsyn, - dedi Nurly jol shaǵyn aýdanynyń turǵyny Daryn Nursaparov.
