Óskemende 18 ret jol erejesin buzǵan júrgizýshi jaıaý qaldy
ShQO Polıtsııa departamenti baspasóz qyzmetiniń málimetine súıensek, tártip saqshylary óńir aýmaǵynda «Boryshker» jedel aldyn alý sharasyn júrgizgen. 3 kún ishinde jol erejesin buzyp, aıyppul tólemeı júrgenderden 16 mln teńge óndirildi. Sondaı-aq 126 júrgizýshiniń avtokóligi mamandandyrylǵan turaqqa jetkizildi.
Máselen, polıtseıler Óskemen qalasynda 38 jastaǵy er adam tizgindep kele jatqan «MERCEDES S280» markaly kólikti toqtatqan. Tekserý kezinde onyń 18 ret jol erejesin buzǵany «Sergek» kameralary arqyly tirkelgeni anyqtaldy. Salynǵan aıyppuldyń jalpy somasy – 354 195 teńge.
«Barlyq ereje buzýshylyq QR ÁQBtK-niń 592-baby (Jyldamdyqty asyrý) boıynsha jasalǵan. Osyǵan baılanysty boryshkerdiń kóligi aıyppuldy tolyq ótegenge deıin arnaıy turaqqa ornalastyryldy», - dedi oblystyq PD bastyǵy Saǵat Mádıev.