Óskemendi tútin tumshalap turǵanyna 10 kún boldy

ÓSKEMEN. KAZINFORM — Óskemen qalasynda qolaısyz meteorologııalyq jaǵdaı qalyptasqanyna 10 kún boldy. Erteń de jelsiz kún kútilip otyr.

Qalada qolaısyz meteorologııalyq jaǵdaı qalyptasqaly beri kóshelerdi tútin basyp tur. Turǵyndardyń keıbiri kásiporyndardy turǵyn úılerden alysyraq jerge kóshirýdi usynsa, basqalary zaýyttardyń murjalaryna jaqsartylǵan súzgiler ornatýdy talap etýde. 

Ekologtar júrgizgen monıtorıng málimetterine súıensek, Óskemende aýaǵa taraǵan birqatar lastaýshy zat mólsheri ruqsat etilgen shekten asyp ketken. Atap aıtqanda, kúkirt dıoksıdi normadan 1,4 esege, kómirqyshqyl gazy 1,5 esege asqan. 

— 25 aqpan saǵat 20.00-den bastap 26 aqpan saǵat 20.00-ge deıin qalada ekinshi dárejeli qolaısyz meteorologııalyq jaǵdaı saqtalady, — delingen «Qazgıdromet» RMK taratqan aqparatta.

Demek, qala aspanyn tútin tumshalap turǵanyna erteń on birinshi kún bolmaq.

Eske salsaq, buǵan deıin Óskemendegi kópirdiń astynan er adamnyń máıiti tabylǵany habarlanǵan.