Óskemen turǵyndarynan úlesker retinde zańsyz aqsha alǵan kompanııa úı qurylysyn aıaqtamady

ÓSKEMEN. QazAqparat – Óskemen qalasy turǵyndarynan úlesker retinde aqshany zańsyz alǵan kompanııa úı qurylysyn aıaqtamady, dep habarlaıdy QazAqparat tilshisi.

Qala ákimdiginiń málimetine súıensek, «Deıneka» qurylys kompanııasy eshqandaı ruqsat qujattaryn rásimdemeı, turǵyndardan úlesker retinde aqshany zańsyz alǵan. Óskemendikterge keltirilgen materıaldyq shyǵynnyń naqty mólsheri áli anyqtalmady.

Olarǵa páter kilti byltyr berilýi kerek bolatyn. Biraq Esenberlın dańǵylyndaǵy eki úıdiń bireýi de salynyp bitpedi.

«Kompanııa basshylyǵy qarjy jetkilikti bolǵandyqtan qurylys jumystary jalǵasatyndyǵyn alǵa tartýda. Biraq úleskerler bul sózge senbeı, sotqa júginbek. Bul máselede biz de shetkeri qala almaımyz. Basty mindetimiz – qala turǵyndaryna zań sheńberinde qoldaý kórsetý», - deıdi qala ákiminiń orynbasary Arman Ysqaqov.

Qazir úleskerler «Deıneka» kompanııasyna qarsy toptyq talap-aryz daıyndap jatyr.