Óskemen turǵyny temeki shegemin dep páterin órtep aldy
Óskemen qalasynyń turǵyny temeki shegemin dep páterin órtep aldy, dep habarlaıdy Kazinform.
ShQO tótenshe jaǵdaılar departamenti baspasóz qyzmetiniń málimetine súıensek, 26 qarashada túngi saǵat 3.00 shamasynda Gogol kóshesindegi kópqabatty turǵyn úıde órt shyqqany jaıly habar túsken.
«Belgili bolǵandaı, 2-qabattaǵy páter órtendi. TJD qyzmetkerleri jedel túrde baspaldaqpen 5 turǵyndy, onyń ishinde 2 balany evakýatsııalady. Sodan keıin úsh ıindi satyny ornatyp, tereze arqyly páter ıesin qutqardy. Kóp uzamaı órt sóndirýshilerdiń úılesimdi is-qımylynyń arqasynda jalpy aýdany 20 sharshy metrdi quraǵan tilsiz jaý tolyqtaı aýyzdyqtaldy», - delingen aqparatta.
Qyzyl jalynmen kúreske barlyǵy jeke quramnan 13 adam men 4 tehnıka tartylǵan.
Apattar medıtsınasy ortalyǵynyń dárigerleri turǵyndardy tekserip, ýaqtyly alǵashqy kómek kórsetti.
Aldyn ala derek boıynsha órttiń shyǵýyna – páter ıesiniń temeki shegý kezindegi abaısyzdyǵy sebep bolǵan.
