Óskemen turǵyny órtengen kórshi úıden áıel men qarshadaı 2 balany alyp shyqty
Óskemen qalasynda er adam órtengen kórshi úıden áje men 2 balany aman alyp shyqty, dep habarlaıdy Kazinform.
8 qarasha kúni qaladaǵy Aqjaýyn kóshesindegi jer úıden órt shyqty. Sol jerge órt sóndirýshiler kelip jetkenge deıin qyzyl jalyndy baıqaǵan kórshisi Andreı Smolnıkov dereý kómekke umtylǵan. Ol 60 jastaǵy áıeldi, 2 jáne 1 jastaǵy eki balany syrtqa alyp shyqty.
«Qutqarýshylar kelgende tilsiz jaý úı men sharýashylyq qora-jaıdy sharpyp jatty. Kóp uzamaı jalpy aýdany 154 sharshy metrdi quraǵan órt tolyqtaı óshirildi. Órt sóndirýshiler janyp jatqan úıden gaz ballonyn alyp shyqqan. Abyroı bolǵanda, zardap shekken eshkim joq», - dep habarlady ShQO TJD baspasóz qyzmeti.
Órtpen kúreske jeke quramnan 12 adam jáne 4 tehnıka jumyldyrylǵan. Ottyń shyǵýyna – elektr jelisin ornatý jáne paıdalaný kezinde qaýipsizdik talaptaryn saqtamaý sebep bolýy múmkin.
Aıta keteıik, Andreı Smolnıkov «Qamqor-Vagon» kásipornynyń vagon-jóndeý deposynda tokar bolyp jumys isteıdi.
