Óskemen irgesine túlki kirip ketti

ÓSKEMEN. KAZINFORM – Óskemen qalasynyń turǵyndary túlkini baıqap, eriktilerge habar bergen. 

Túz taǵysy Jibek matalar kombınaty yqsham aýdanyndaǵy Kúlenov kentinde kózge túsken. «Dvorıanın» janýarlar quqyǵyn qorǵaý qoǵamdyq qorynyń eriktileri qyzyl túlkiniń qala aýmaǵyna kezdeısoq kirip ketken bolýy múmkin ekenin málim etti.

– Keıingi on kúnde kent kóshelerinde túlki kózge túsip júr. Jergilikti turǵyndar bul ańdy aýlaýdy suraǵanymen, biz tek aýrý nemese jaraqat alǵandaryn ǵana ustaýymyz qajet. Al bul túlkiniń syrt kózge deni saý ekeni baıqalady, - delingen aqparatta. 

Orman jáne ańshylyq sharýashylyǵy jedel áreket etý jasaǵynyń málimetinshe, turǵyndar tarapynan túlkige qatysty eshqandaı ótinish túspegen. 

Eske salsaq, osyǵan deıin Ertis ormanynda emin-erkin jaıylyp júrgen elikter kózge túskeni habarlanǵan.