Óskemen qalasyndaǵy kóshege Ámireniń aty berildi
Kún tártibine oblys ortalyǵyndaǵy 12 kósheniń atyn aýystyrý týraly másele qoıyldy. Oktıabr kóshesine Muhametjan Tynyshpaevtyń, Krýpskaıa kóshesine Evgenıı Brýsılovskııdiń, Revolıýtsıonnaıa kóshesine Qalıhan Ysqaqtyń, Sovetskaıa kóshelerine Adolf ıAnýshkevıch pen Aleksandr Zataevıchtiń, Dzerjınskıı kóshesine Ámire Qashaýbaevtyń, Kırov kóshesine Anton Chehovtyń, Ordjonıkıdze kóshesine Saǵadat Nurmaǵambetovtiń, Kýıbyshev kóshesine Naryn ataýyn, Kalının kóshesine Shyńǵystaý ataýyn berý týraly usynysty qalalyq máslıhat depýtattary biraýyzdan qoldap, respýblıkalyq onomastıkalyq komıssııanyń qaraýyna jiberdi.
Ataýy ózgergen kóshelerdiń ishinde keńestik kezeńnen qalǵan eski ataýlarmen qosa táýelsizdik jyldarynda qaıta atalǵan kósheler de bar. Qalada ekinshi dúnıejúzilik soǵys batyry Іzǵutty Aıtyqovtyń atynda eki birdeı kóshe bar ekeni aıtylyp, onyń birine Asar degen qazaqtyń kıeli ataýy berildi. Al 2002 jyly ataýy ózgergen Golovkov kóshesi araǵa 16 jyl salyp Beıbitshilik degen ataýǵa ıe boldy.
«2002 jyly Óskemenniń ıdeologııasynda keshirilmes qatelik ketken bolatyn. Elimiz táýelsizdigin jarııalap, memlekettiń irgesin qalap jatqan kezde Shyǵys Qazaqstannyń bir bóligin Reseıge qosyp berý týraly usynys aıtyp, halyqtyń berekesin buzǵan adamnyń biri osy Golovkov bolatyn. Keıin Parlament tórinde otyryp, qazaq tiline memlekettik til statýsyn berýge qarsylyq tanytqan. Eldiń arasyna iritki salǵan adamnyń atyndaǵy kóshege Beıbitshilik ataýynyń berilýin ádildiktiń ornaýy dep túsiný kerek» - deıdi «Altaı asýy» qoǵamdyq birlestiginiń teń tóraǵasy Túsiphan Túsipbekov.
